Dear Noy Kulas,
Alyasi lang ko og Rick, supervisor sa usa ka dakong kompaniya. Ulitawo pa ko, but naa koy girlfriend. Sa among work dili malikayan nga magkasuod gyud mi sa among mga kauban. Usa niini si Mitchie, dili tinuod niyang ngalan, kauban nako nga supervisor. Naa siyay kapuyo ug duna silay usa ka anak. Lima ka tuig na silang nagpuyo. Ang lalaki way tarong trabaho, magsige lang og balhin kay tapulan, pilian og trabaho. Ang nakapait kulatado ang akong kauban. Ari siya tigtug-an nako sa iyang mga problema.
Karon nagkadugay naa na koy na-feel para niya nga unusual. Mingawon na ko niya kon mag day off ko. Malipay ko if ting-work na kay magkita na mi. Mag-chat hinuon mi og sige basta wala ang iyang partner sa balay but need siyang mouna og chat kay basin naa ang lalaki kay seloso kuno kaayo, ma-ngutana kinsay ka chat. Ako na siyang gisultihan sa akong na-feel niya. The same kuno mi, but mahadlok siyang makasala sa iyang partner. Ako siyang giingnan nga andam kong modawat niya ug sa ilang anak ug buwagan ang akong GF basta magkakami. One time, she let me kissed her lips. Sakto kaha ang akong gisulti niya? Maayo kaha ni?
RICK
Rick,
Usahay maanod gyud ta sa nagkayo nato nga pagbati, labina kon bag-o pa. Usahay ang atong pagbati sama sa sagbot nga kugon, paspas kaayong mosilaob, apan mamatay dayon. Busa, ayaw pagdalidali sa imong desisyon nga posibleng imong mahayan kon mo-settle down na ang tanan.
Kuyaw baya sab na ang iyang partner kay siya mismo nagmatngon gani kay bayolente. Daghan na ra ba sa mga krimen nga linugdangan o resulta sa love triangle. Duna nay mga kinabuhi nga nangakalas tungod gihapon sa samang mga hitabo. Nagbutang ka sa kakuyaw sa imo ug iyang kinabuhi kon imo man siyang pugson sa pagtangdo sa imong gusto nga mahitabo.
Let her decide on her own. Ayaw siya hatagi og laing problema pinaagi sa pagpapili nimo ug sa iyang kapuyo. Huwata nga siya mobiya sa iyang kaugalingon nga desisyon nga dunay pagtugot sa iyang pamilya. Mas maayo nga sa iyang kabubut-on magagikan ang tanan, dili tungod sa imong pagsige og kombinser niya. Timan-i duna silay anak, so dili na sayon nga buhaton. Kinahanglan careful kay ang bayolente nga tawo dili sab normal kaayo og pangutok.
Kon wala na siya sa mga kamot sa iyang kapuyo, diha ka na sab maghunahuna if she is worth it. Busa ayaw pagdalidali sa imong desisyon.
NOY KULAS
rojval69@yahoo.com