Dear Noy Kulas,
Tawga lang ko sa alyas nga Bimbo, 37 years old. Ang akong problema parte ni sa akong asawa nga nagtrabaho sa usa ka clinic. Nakasal mi ten years ago ug nakaanak mi. Paraygon kaayo ni ang akong asawa bisan uyab pa mi mao seguro nga grabe ko ka-in love niya. Bisan minyo na mi nagpabilin ang iyang kaparaygon diri nako. Human nanganak mao gihapon. Di siya mokaon if wala ko ug di makatulog kon wa ko sa iyang tupad.
Apan nahibulong ko kay late last year, anam-anam na man siya og kausab sukad nakauban nila ang usa ka lalaki sa ilang clinic. Pirmi na siya kuyog sa ilang mga kauban ug dunay weekend nga wa siya sa balay kay nag-outing silang tanang mga staff. Okay ra ko sa sinugdan kay nagtuo kong bag-o lang nila ning gibuhat, pawala sa stress. Diha na ko nalain og sugod kay di na siya magsige og lambing nako ug usahay akong tuyuon nga maglambing, mangwakli, masuko kay tiguwang na kuno mi.
Kaniadto magsige na siya og chat, text or call nako basta naa sa clinic while ako nag-work. Ako siyang gi-confront sa changes nga akong naobserbahan. Matod niya nga ako ra kuno ning huna-huna. Naa pay mga time nga maligo siya dayon unyag abot. Kon akong pangutan-on kon nganong naligo siya, moingon ra nga daghang tawo sa clinic nga di man siya ingon-ana kaniadto.
Noy, angay ba kong magduda niya? Di kaha tungod kay naa siyay laing gikabuangan? Sukad naa na ning lalaki sa ilang clinic, nausab na siya. Mao na ang akong nabantayan. Unsa kahay akong buhaton?
BIMBO
Bimbo,
Angay sab kang magduda kay duna may mga kausaban sa iyang mga lihok. Ingon pa nimo di na siya lambing ug lainan na gani kay kuno tiguwang na mo. Nagsige pa sila og outing ug sa akong sabot nagsugod ni dihang nakatrabaho ang ilang kaubang lalaki isip staff. Napun-an pa ni kanang maligo siya nga di niya naandan nga gibuhat. Kini mga indikasyon lang, wa nagpasabot nga husto ang imong pagduda.
Pakig-istorya una niya kay basin duna siyay laing problema nga wa lang niya gisulti diha nimo. Isip bana, sultihi siya nga imong katungod ang magpakisayod kay you live as one. Basin na-stress siya ug uban pa. Aron gyud masuta nimo nga di tinuod ang imong pagduda panid-i siya. Kanang visual nga paniid aron mahimutang ang imong huna-huna.
NOY KULAS