Dear Noy Kulas,
Ako si Delia, 52 anyos, kanhi OFW. Naproblema ko sa usa nako ka anak nga babaye kay sulod na sa daghang katuigan wa ko niya tagda kay wa kuno koy ayo nga pagkainahan. Sa tanan nakong mga anak siya ra ang nasuko nako, wa nakasabot sa akong gibuhat nga sakripisyo. Singko anyos siya sa akong pagbiya.
Ako tong gihimo kay wa man koy nakitang trabaho kay college undergraduate ko kay namabdos. Ang akong bana wa say tarong nga trabaho. Nagmahay ko, but ulahi na ang tanan. Sakit man tuod pero nibiya ko nila aron manimpalad sa laing nasod. Tuod man, ako silang napahuman sa pagpaeskwela, but ang akong usa ka anak nga babaye sukad pa ni sa una di managad nako. Nagtuo ko nga masulbad ra ni pero hangtod nga naa siyay pamilya, naa gihapon ang iyang kasuko nako. Wa gani ko patambunga sa iyang kasal. Ngano kaha, Noy Kulas, nga ingon ana siya? Unsa kahay akong buhaton aron ako siyang mapasabot nga ako tong gibuhat aron duna silay maayong kaugmaon?
DELIA
Del,
Wa ka nag-inusara kay duna say mga ginikanan, inahan ug amahan, nga sama nimo gikasuk-an sa mga anak nga wa nakasabot sa inyong sakripisyo sa pagbiya ninyo aron sila makaangkon og maayong kaugmaon. Duna say nagtuo nga hayahay ang inyong kinabuhi ug sayon ang pagbiya sa ginikanan.
Una, pasayloa siya sa iyang gibuhat nimo. Mao na ang labing importante nga wa ka nasuko ug nagdumot. Duna ra bay mga ginikanan nga gikasuk-an sa anak, wa sab tagda kay nalain ang ginikanan. So ang nahitabo nagdumtanay ang duha bisan ang usa naa naa sa duol sa kamatayon.
Ikaduha, wa kinahanglana nga mopasabot ka sa imong anak sa imong gibuhat kay bisan unsaon nimo, di gyud na gihapon makasabot nimo kay close ang iyang hunahuna.
Ikatulo, hayan duna siyay kasinatian nga di maayo. Alang niya di unta kadto mahitabo kon naa ka pa lang uban nila. But kini ispekulasyon lang, posibleng di tinuod. Ayaw na lang kuykoya kon wa siya nagpakabana gani sa pagpakigsulti nimo. Ang importante imo siyang napasaylo sa iyang gibuhat.
NOY KULAS
rojval69@yahoo.com