Dear Noy Kulas,
Maayong adlaw ninyo sa Superbalita, labina nimo Noy Kulas. Tawga lang ko og Temyong, 56 anyos na.
Biyudo na ko for 15 years kay namatay ang akong asawa sa disgrasya. Two years na ko nga naay live-in nga 43 na sab ang edad. Gusto siya nga magpakasal mi pero nahadlok ko kay dili ko kampante sa iyaha tungod sa iyang personalidad. Bisan ang akong mga anak dili ganahan niya. Ako na lang siya i-describe, Noy Kulas, aron makasabot ka nganong dili kaayo ko makasalig niya.
Una, ikatulo na ko nga iyang live-in kay pulos palpak ang unang duha kay matod niya dili sila magkasinabot. Mao to nag-background check ko ug didto akong nahibaw-an nga kini siya playgirl, bisan kinsa lang ang uyab. Shota ng bayan ang tawag. Gastador sab kaayo ni siya ug daghan og utang kaniadto. Hinuon nabayran niya tanan kay nagkaanam man og umento ang iyang panginabuhi. Maayo ni siya sa sales so nakanegusyo. Hangtod karon laagan ug ang nakapait dili ko pakuyogon kay mga barkada ra kuno nga laag but kon ako, dad-on nako siya pirme.
Daghan ko og real properties sa Mindanao nga amoang napalit sa akong misis dihang buhi pa siya. Karon nag-earn na ko og maayo bisan pa og moundang ko sa akong business nga buy and sell. Mao na nga ang akong mga anak nagduda nga nag-after ni siya sa akong properties kay edaran na gud ko.
Nag-ultimatum na baya siya nga if dili nako siya pakaslan next year magbuwag mi. Love na baya nako ni siya pero ang akong kahadlok basin matinuod ang duda sa akong mga anak niya. Noy, magpatambag ko nimo kon unsay akong buhaton. Uyonan ba nako siya o dili? Daghang salamat.
TEMYONG
Temyong,
Angay sab nuon kang magduda niya tungod sa iyang background. Samot na kay maora siya og closed sa ubang aspect sa iyang pagkatawo kay wa ka ipailaila sa iyang mga barkada kon tinuod man sab nga sila ang kuyog sa bakasyon. Angay unta ikuyog ka bisan panagsa lang kay aron mapakita niya nga proud siya nimo.
But naa man kay magamit nga panagang ug dinhi sab masukod kon serious ba siya nimo ug sa inyong relasyon. Suwayi pagsulti nga mag prenuptial agreement mo nga ang inyong tagsa ka properties, apil na finances nga acquired before mo makasal, inyoha lang, wa moy labot sa usa’g usa. Kini kon mobalibad siya, atras na lang kay klaro na unsa ang iyang tuyo.
Ikaduha, wala na siyay bakasyon nga dili ka makakuyog kay naa man kay katungod isip iyang bana. Kon dili siya mosugot, lain na sab ni nga warning nimo. Dinhi ning duha, if pulos siya balibad, then dako kaayo ang posibilidad nga materyal ang iyang giapas nimo. Basin manghantukay gyud ni siya. Di gugma, kon di kwarta ang iyaha. Atras dayon human ini.
NOY KULAS
rojval69@yahoo.com