Tambagi ko Noy Kulas: Sakpan lagi
Dear Noy Kulas,
Daghan ang nangandoy nga ma-rich pero kon mao na lang say hinungdan sa pagkabungkag sa pamilya, maayo pa og wala. Itago lang ko sa alyas nga Shen, 38 years old, minyo ug dunay anak.
Kaniadto pobre mi, struggling mi nga pamilya. Wala pa gani nakatugpa ang among kuwarta sa among mga kamot, gibayad nas mga utang.
Kaning among maayong kahimtang nagsugod lang ni atol sa pandemic. Kay ang among work mahulog nga essential, makagawas ra mi sa balay unya naa pa mi motor. Nagsugod lang mi sa delivery sa mga butang, hangtod niabot sa mga pagkaon ug bisan unsa. Paspas ang pagdaghan sa among mga kustomer. Pagsulod na namo sa merchandise, diha na mi niasenso og maayo.
Nag-buy and sell na mi until nakatigom og kuwarta, nabayran ang mga utang ug nakapalit mi og sakyanan, napadak-an ang among balay. Asenso gyud kaayo mi. Pero mao ni ang problema, nangabit ang akong bana. Nasakpan nako ang iyang kaboang nga usa sa among mga kustomer nga babaye iyang gikabit kay na-open nako ang ilang convo sa Viber.
Ako siyang gipalayas pero nahunong sab ang among business kay siya man ang nag-manage sa tanan. Wala na siya niuli sa amoa ug dili na ma-contact. Unsa may akong buhaton? Ako ba siyang pangitaon ug papaulion? Ako ba siyang pasayluon? Naguol baya ang among mga anak nga wa na nauli ang ilang papa.
SHEN
Shen,
Unsa man ang imong rason, imo siyang pabalikon kay naundang ang inyong negosyo o tungod kay imo siyang gihigugma gihapon? Kon ang imong tubag negosyo, ayaw na lang kay magubot ra gihapon mong duha kay gipabalik mo siya tungod sa mabaw nga rason, ang materyal nga katarungan. Apan kon duna kay pagbati nga nahabilin alang kaniya ug andam kang mopasaylo, dili kay ako ang mosulti nimo nga pasayloa siya, then pabalika. Papaulia siya sa inyoha.
Buhata lang ni kon andam ka nang mopasaylo. Leksyon sab ni nimo ug sa imong bana nga dili dayon diha-diha modesisyon nga sa way paghunahuna sa posibleng mga linugdangan. Kadaghan sa mga magtiayon nga susama ninyo og problema apan ilang giestoryahan, gitan-aw ang hinungdan ug solusyon. Kon magkaatubang man mo, pag-estorya sa inyong problema. Will he say sorry? Nagbasol ba siya? If wala, ayaw lang sab una siya papaulia kay mosubli ra gihapon na siya sa iyang gibuhat.
NOY KULAS
rojval69@yahoo.com