Dear Noy Kulas,
Usa ko ka server sa usa ka kan-anan, single mother ug nag-edad na og 26 years old.
High school graduate lang ko unya maoy nag-support sa akong anak kay wala na magpakita ang amahan sa akong anak sukad siya nakabalo nga mabdos ko.
Sa kan-anan, naa koy kauban nga biyudo, kusinero ug maayo kaayo moluto. Bisan nakahuman na og eskwela ang iyang tanang mga anak, nagtrabaho siya aron malingaw ug dunay kaugalingong income aron dili siya magsalig nila. Kusog ang kaon sa tindahan kay lami kaayo siya moluto. Daghan ang ganahan sa iyang linutoan.
Buotan kaayo siya. Usahay iya kong sekretohan og hatag og kuwarta pangdugang kuno sa konsumo. If ma-absent ko sa tindahan kay nasakit akong anak, iya kong adtuon sa balay aron susihon naunsa ko.
Bisan sa iyang edad, ganahan na man ko niya. Nakabantay ko nga magsige ni siya og tan-aw nako kon naa ko sa kan-anan.
Naa say nisulti naku nga ganahan siya nako pero naikog lang manguyab. Akong giingnan ang nisulti nako nga wala koy problema. Sukad siya nakabalo nisamot iyang care diri nako. Sakto kaha nga ako siyang sugton if mo-court nako? Di ba lain tan-awon nga dako among age gap? Please tambagi ko.
ERMA
Erm,
Kon ang mga tawo hilabtanon sa kinabuhi sa uban, lain gyud na ang ilang pagtan-aw. Apan sa sugod ra sab na, maanad ra na sila. Hinuon pangutan-a ang imong kaugalingon kon kanang mga tawhana nga imong gituohan nga hilabtanon makatabang ba sa imong kaugalingon ug sa imong anak, labina sa pag-atiman sa imong anak?
Ang imong kabalak-an kon imo siyang sugton makadawat ba ang iyang pamilya? Ang imoha sab? If naa silay daghang katigayunan posible nga bati sila og reaksyon. If ordinaryo ra kaayo sila nga pamilya, mas malipay tingali sila kay duna na may kalingawan ug makaatiman sa ilang amahan nga hapit na ma senior citizen. Ang importante diha sa relasyon mao ang gugma ninyong duha, kon nagkahigugmaay ba mong duha ug duna lay nangita lang og opportunity, sama sa naay makadugang sa income sa imong side, samtang kaibog sa batan-on ang iyaha diha nimo, di na maayo. Apan kon nagkahigugmaay mo, ayaw huna-hunaa ang pagtan-aw sa ubang mga tawo. Ang importante mao ang inyong tagsa-tagsa ka kinabuhi.
NOY KULAS
rojval69@yahoo.com