Tambagi ko Noy Kulas: Selosa kaayo

Tambagi ko Noy Kulas
Tambagi ko Noy Kulas(SunStar File Photo)

Dear Noy Kulas,

Maayong adlaw kanimo, ug sa imong followers. Usa ko ka OFW.

Mangayo lang ko og advice. About ni sa akong karelasyon nga LDR. 24/7, walay putol ang tawag or call. Bisan natulog naka call gihapon.

Ang problema gidudahan ko nga naay babaye nga ka chat ug ka call kon mawala ang signal.

Palihog tabangi ug tambagi ko, Noy Kulas. Hinaot nga imong mabasa ning akong suwat. Unsay angay nakong buhaton? Gusto na ko nga buwagan na lang kay sakit na kaayo akong ulo. Super selosa kaayo.

Naa koy anak sa una ug toa sa una nakong asawa. Naay time nga akong gi-message akong anak, nasuko ang ka live in partner nako. Nagli­bug na ko.

ROY NOLD

Roy Nold,

Kon wa ka nay kalipay sa relasyon nga gubot tungod sa iyang grabe kaselosa, putla na lang na aron makabaton mong duha og peace of mind.

Samtang wa kay gibuhat, siya nagduda nga duna kay gibuhat. Bisan pag unsay imong buhaton, kon grabe siya ka insecure sa iyang kaugalingon ug nag-manifest sa inyong relasyon, ingon ana na gyud na ang estado sa iyang panghuna-huna ug sa iyang pagtan-aw nimo. Kon insecure ang tawo, lisod makuha ang trust. Lisod usbon ang panan-aw o perception sa usa ka tawo nga insecure kay sila mismo nag-struggle sa pag-usab.

Kana lang inyong 24/7 nga call, akong duda, iyaha na nga ideya. Kana klaro kaayo nga pagpakita o timailhan sa usa ka tawo nga insecure. Maora og bata ba nga mahadlok biyaan sa iyang ginikanan. Mohilak kon di na makakita bisan sa anino lang sa ginikanan. Kana nga klase sa personalidad lisod kaayo i-deal, labina sa sulod sa usa ka relasyon.

Nianang iyang ka insecure, grabe ka selosa, iya pang initan ang imong responsibilidad ngadto sa imong anak. Di na sab na maayo. Busa, mas maayo pang diha-diha putlon mo ang inyong relasyon nga wa maghatag kanimo og maayo ug malinawon nga pagpuyo diha sa abroad. Mas maayo pang wala na lang.

NOY KULAS

rojval69@yahoo.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph