Dear Noy Kulas,
Tawga lang ko sa alyas nga Ana, 35 years old, single but duna na koy fiancé. Upat na mi ka tuig nga nagkarelasyon sa akong boyfriend. Sa kadugay na sa among relationship, karon lang kong bag-o nakaadto sa ilaha sa Mindanao kay namakasyon mi ug nakaila sa iyang pamilya. Siya ang eldest sa tulo ka siblings and the only male. Nagmahay ko nganong nikuyog pa ko sa akong BF sa iyang pag-uli sa ilang lugar sa Mindanao kay dili maayo ang akong experience.
Maayo sila pagkabutang, while kami ordinaryo lang dinhi sa Cebu. Ang iyang mama matapobre kaayo ug akong nadunggan nga nangasaba siya sa iyang anak kay nganong mangasawa siya og ordinaryo og kahimtang. Gusto niya nga buwagan ko ug mangita og sama nila og level. Lain sab og tinagdan ang iyang mga igsuon diri nako.
Nakahilak ko while listening sa ilang lalis ug wala nakahibalo ang akong BF nga akong nadunggan ang tanan kay gatuo siyang natulog pa ko. Like sa iyang inahan, nagplastik ko, nagpa as if nga wala nakabalo sa hitabo. Sa among pag-uli dinhi, gusto unta nako siyang sultihan nga nakabalo ko sa gusto sa iyang mother but naglibog ko kon ako ba siyang pahibaw-on o dili kay magminyo na ra ba mi next year. Unsa kaha, ako na lang siyang sultihan ug bulagan? Dili ko ganahan sa iyang pamilya.
ANA
Ana,
Sultihi ang imong boyfriend nga nakadungog ka sa tanan parte sa gisulti sa iyang inahan labot nimo. Angay siyang masayod nga nakahibalo ka nga wala nakauyon nimo ang iyang pamilya, labina ang iyang inahan. Mas maayong mahibalo siya aron sab ma-release ang imong gibati nga kasakit sa imong nadunggan gikan sa iyang mama. Unya give him the free will kon magbuwag ba mo o dili, instead nga ikaw lang ang mohukom nga putlon ninyo ang inyong upat ka tuig nga relasyon. Kay bisan tuod arangan sila sa pagpuyo samtang ikaw ordinaryo lang, yet he is proud of you kay iya gani kang gidala sa ilang dapit aron makaila kanimo ang iyang pamilya. Siya ang angay nga mo-decide kon buwagan ka ba o dili kay ang iya mang pamilya ang wala nakagusto nimo.
Gawas pa, dili man kamo sa iyang pamilya ang mag-uban sa pagpuyo, kon dili kamo ra mang duha. And kalagmitan dili man tingali mo moadto sa Mindanao, diri ra mo sa Cebu mopuyo kay mas daghan ang opportunities dinhi itandi didto. Dili lang kay kana, ang imong fiancé klaro nga dili pareho og batasan sa iyang pamilya kay nipili gud siya nimo bisan sa imong status sa pagpuyo. Kana maoy hinuktoki pag-ayo.
NOY KULAS
rojval69@yahoo.com