USA ka surprise visit ang gihimo ni Cebu Governor Pamela Baricuatro ngadto sa Minglanilla District Hospital niadtong Hulyo 3, 2025, nga kabahin sa iyang tinguha nga masayran ug makita ang tinuoray nga kahimtang sa upat nga provincial ug 12 ka district hospitals sa lalawigan.
Naobserbahan ni Baricuatro nga buak nga tiles, kuwang nga kagamitan, ug kuwang sa mga bakuna.
Nisugyot si Baricuatro nga mobutang og air-conditioning unit sa pharmacy sa Minglanilla District Hospital ilabi na nga gikinahanglan ang tukma nga temperatura sa tambal ug bakuna aron ma-preserbar.
Si Dr. Elisse Nicole Catalan, anak ni Baricuatro, nagkanayon nga lakip sab sa gikinahanglan sa maong ospital ang labor room, delivery room, ug operating room.
“Ang dentist office sad walay dental chair pero gi-work on na na siya so makadawat na sila soon,” matod ni Catalan.
Subay sa dugang pagsusi, giangkon sab sa gobernador nga duganganan gyud ang mga medical personnel sa tambalanan aron matagad ang mga pasyente. / ANV, Hulagway ni Juan Carlo de Vela