Gipanalipdan ni Mayor Nestor Archival si City Administrator Albert Tan gikan sa mga pagsaway ni Bise Mayor Tomas Osmeña nga ginganlan niya'g bulay-og.
Si Tan kinsa gitudlo ni Archival isip City Administrator human sa eleksyon sa 2025, maoy nagdumala sa matag adlaw nga operasyon sa kagamhanan sa dakbayan, lakip na ang pag-supervise sa mga hepe sa departamento ug ang pagpatuman sa mga programa sa siyudad.
Bisan kon giisip siya nga importanteng tawo sa administrasyon ni Mayor Nestor Archival, si Tan dili mao ang gusto ni Tomas Osmeña sa dihang gihimo ang appointment.
Sa usa ka interbyu kaniadto, giingon ni Osmeña nga si Tan kulang og igong kasinatian sa public service.
Giangkon usab niya nga lahi ang iyang gusto kumparar sa gusto ni Archival.
“Tan is the mayor’s choice. It would not be my choice, but he is entitled to do that. We have to respect that,” matod ni Osmeña.
Nibuto ang kontrobersiya atol sa State of the Barangay Address (Soba) sa Barangay Mabolo niadtong Dominggo, Marso 29, diin sa publiko gitawag ni Osmeña si Tan nga “banga” o walay katakos, ug gipadangat sab niya ang kabalaka bahin sa kalangan sa suholan sa mga kawani.
Apan gipanalipdan ni Archival ang iyang tinudlo ug gipakaminus lang ang pagsaway isip kabahin sa naandan nga dagan sa panggobiyerno.
“Dili man… wala ra ko niana,” matod niya sa usa ka press conference niadtong Martes, Marso 31, 2026.
Dugang pa niya nga ang mga tawo adunay managlahing sukdanan.
Gihatagan niya og gibug-aton nga si Tan nagtrabaho ug naghatag og resulta para sa administrasyon.
“Para nako, nagtrabaho si Albert. Akong nakita nga duna siyay mga agi o resulta, busa barugan nako ang akong city administrator,” matod ni Archival, bisan kon wala siya nihatag og konkretong mga pananglitan sa mga kalampusan niini.
Ang maong panagbangi nagpakita sa dugay nang deperensya sa mayor ug bise mayor kalabot sa pagkatudlo ni Tan.
Niadtong Agusto 2025, nagpahayag na og pagduhaduha si Osmeña apan niingon nga andam siyang mohatag og higayon ni Tan sa pagpamatuod sa iyang kaugalingon.
Bisan pa sa nagpadayong pagsaway, namugos si Archival nga ang komunikasyon tali nilang duha ni Osmeña nagpabiling maayo, samtang gipalig-on niya ang iyang pagsalig sa papel ni Tan sa pagdumala sa kagamhanan sa dakbayan. /