“Mogwapa tanang babaye kon mahubog ko.”
Kini ang sulti ni Christopher Rafols, 19, ex-convict, kinsa napusasan human giingong nangumot og tutoy sa menor de edad nga babaye alas 10 sa gabii sa Miyerkules, Pebrero 28, 2024, sa Sitio Sto. Niño, Brgy. Suba, dakbayan sa Sugbo.
Gipadakop sa kapulisan si Christopher human ang ginikanan sa 17 anyos nga dalaga nisumbong ngadto sa mga barangay tanod.
Dihang nahinabi sa Superbalita Cebu, ang suspek niangkon sa krimen apan nibutyag nga hubog siya niadtong higayuna dihang iyang nasugatan sa dan ang 17 anyos nga higala.
Apan, iyang gihimakak nga iyang gikumot ang tutoy kay igo lang kini niyang gihikap.
Gipasabot niini nga nakainom siya og usa ka bol sa tuba.
“Kon makainom ko’g tuba, tripping nako manghikap og babaye. Mogwapa sab ang akong tan-aw sa babaye,” dugang ni Rafols.
Nangayo siya’g pasaylo sa biktima.
Giangkon niya nga nasulod na siya sa Cebu City Operation Second Chance dihang menor pa sa kaso’ng acts of lasciviousness.
Si Rafols kasamtangang gitanggong sa Sawang Calero Police Station samtang, giandam ang tukmang kaso batok kaniya.
Ang makombikto sa kasong acts lasciviousness dunay silot nga pagkabilanggo og unom ka buwan ngadto sa unom ka tuig depende sa kabug-aton sa salaod. / GPL