Gimando ni Gobernador Pamela Baricuatro ang paghimo og komprehensibong report status sa tanang flood control projects sa tibuok Lalawigan sa Sugbo.
Base sa datos nga giluwatan sa Philippine Communications Office (PCO), ang Sugbo nakatala og moabot sa 441 ka mga flood-control projects subay sa national inventory nga gihimo gikan sa Hulyo 2022 hangtod sa Mayo 2025.
Ang gobernador kinsa nakakita sa ranking sa Sugbo nipadayag sab nga bukas siya sa pagpaubos sa imbestigasyon sa tanang proyekto nga naglangkob sa flood-control.
Ang inventory sa Sugbo naglakip sa P120.6-million Ocaña River Flood Control Structure sa Carcar City nga nakompleto sa Marso 1, 2025, ug duha ngadto sa upat ka multi-million-peso flood-control works sa Mananga River sa Talisay City.
Subay sa nasayran, ang Mananga River projects ubos lang sa usa ka kontraktor nga QM Builders nga maoy nagtrabaho sa duha ka proyekto sa Barangay Lagtang ug Jaclupan, Talisay.
Sa amihanang Sugbo, ang P49-million Taytayan Creek Flood Control ug Drainage System sa Bogo City nakompleto sa Pebrero 9, 2025, samtang ang P57.89-million Jagobiao Creek Phase 3 structure sa Consolacion nahuman sa Pebrero 23, 2025.
Gawas niini, ang Mandaue City aduna usa'y P72.32-million Butuanon River downstream outfall project sa Barangay Paknaan ug P67.45-million Orel Creek flood control sa Barangay Banilad.
Ang ubang mga lungsod nakabenepisyo sab sa upstream defenses sama sa P149.84-million Cotcot River flood-control project sa Liloan nga kasamtangang gipangulohan sa MC Geometric Proportions Inc. ug Alpha & Omega Gen. Contractor & Development Corp.
Ang labing uwahing proyekto sa listahan mao ang P4.93-million drainage structure sa Barangay Sacsac, Consolacion nga nakompleto sa Mayo 27, 2025, sa XLA Construction.
Sa nasayran, ang QM Builders usa sa dakong kontraktor sa Sugbo maoy ginganlan nga nahilakip sa top 15 contractors sa tibuok nasod nga dunay labing daghan nga flood-mitigation projects. / ANV