Nipadayag na sa iyang siyento porsiyentong kaandam si Filipino Marlon “The Nightmare” Tapales kabahin sa iyang pagpakigbatok kang Japanese Naoya “Monster” Inoue sa gikahinamang super bantamweight unification bout karong Disyembre 26, 2023 sa Tokyo, Japan.
Sa interbyu sa Business Mirror, nagkanayon ang 31 anyos ug lumad nga taga Tubod, Lanao del Norte nga niini pa lang puntoha, andam na siyang moulbo ibabaw sa ring aron maalkontra ang kabangis ni Inoue.
Si Tapales maoy International Boxing Federation (IBF) ug World Boxing Association (WBA) super bantamweight king.
Iyang isugal ang iyang mga bakos alang sa World Boxing Organization (WBO) ug World Boxing Council (WBC) titles ni Inoue.
Kon modaug si Tapales ning awaya, mokulit siya og kasaysayan isip labing unang Pinoy nga undisputed champion.