Depensaan ni Filipino Marlon Tapales ang iyang World Boxing Council (WBC) Asian Continental super bantamweight title batok ni Saurabh Kumar sa India sa Septiyembre 7, 2024, sa Phnom Penh, Cambodia.
Mao kini ang labing unang depensa ni Tapales sa korona nga iyang nalabni pinaagi sa makapaukay nga 1st round knockout nga kadaugan batok ni Thai Nattapong Jankaew niadtong Mayo 10, 2024 sa Midas Hotel and Casino sa Pasay City.
Kon kasinatian ang hisgutan, tataw nga nakabintaha og dako si Tapales, kinsa kanhi world champion ug adunay 38-4, 20KOs nga rekord kumpara sa 11-1-1, 6KOs nga baraha ni Kumar. Kini nga away nagsilbeng usa sa mga taytayan ni Tapales aron makapanuktok pagbalik alang sa world title.
Si Tapales maoy kanhi naggunit sa International Boxing Federation (IBF) super bantamweight belt nga nawala sa iyang mga kamot human siya nasugamak sa 10th round knockout nga kapildihan batok ni Japanese Naoya “Monster” Inoue sa ilang unification bout niadtong Disyembre 26, 2023. / ESL