Tapales vs. Thai karon

Tapales vs. Thai karon

Human sa iyang kapildihan batok kang super bantamweight undisputed champion Japanese Naoya “Monster” Inoue, ang kanhi world champion nga si Filipino Marlon Tapales mobalik na pag-away karong gabii, Mayo 10, 2024, sa Midas Hotel and Casino sa Pasay City.

Ning maong tahas, kontrahon ni Tapales si Thai Nattapong Jankaew alang sa inilugay sa bakanteng World Boxing Council (WBC) Asian Continental super bantamweight belt.

Si Tapales, kinsa nasugamak sa 10th round knockout nga kapildihan batok kang Inoue niadtong Disyembre 26, 2023 sa Japan, namasin nga pinaagi ning awaya, makaabli siya og pultahan nga maghatag kaniya og laing kahigayunan nga makapanuktok pagbalik alang sa world title.

Taliwala sa iyang kapildihan batok ni Inoue, ang gitawag og “Nightmare” nagpabiling taas og ranking sa duha ka mayorihiyang boxing bodies.

Siya ang No. 3 sa WBC ug No. 5 sa International Boxing Federation (IBF).

Si Tapales naggunit og 37-4, 19KOs nga rekord samtang si Jankaew adunay 12-3, 8KOs nga baraha.

Sa co-main feature, si kanhi interim world titleholder Reymart Gaballo makigbatok ni Mexican Kenbun Torres.

Si Gaballo, kinsa bantamweight No. 1 sa World Boxing Organization (WBO) ug No. 4 sa IBF, adunay 27-1, 22KOs nga rekord samtang si Torres naggunit og 13-5, 9KOs nga baraha. / EKA

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph