Nasikop ang usa ka construction worker sa gilusad nga buy-bust sa mga sakop sa Philippine Drug Enforcement Agency (PDEA)-Negros Oriental Provincial Office uban sa Negros Oriental Police Provincial Office ug Dumaguete City Police Station alas 10:46 sa buntag, Martes, Pebrero 18, 2025, sa Caritas II, Barangay Bajumpandan, Dakbayan sa Dumaguete.
Ang nasikop giila nga si alyas Jonas, 35, nagpuyo sa maong lugar ug nabutang sa provincial target list sa PDEA.
Nasakmit sa PDEA 7 ang pito ka pakete sa gituohang shabu nga motimbang sa usa ka gramo nga dunay estimated average market value nga P6,800 lakip na ang mga drug paraphernalia.
Matod ni Leia Alcantara information officer sa PDEA 7 nga usa ka semana nga gipaubos sa case buildup ang suspek ug giingong makabaligya kini og 16 gramos nga shabu matag semana.
Ang mga ebidensya nga nakuha, gi-turnover sa PNP Negros Oriental Forensic Unit alang sa chemical analysis.
Kalasapasan sa Section 5 ug 11, Article II, Republic Act 9165 ang atubangon nga kaso sa suspek. / AYB