Nitukod og multi-agency task force ang Kagamhanan sa Dakbayan sa Mandaue aron sumpuon ang mga scam hub, illegal drug laboratories, sugalan, ug uban pang matang sa organisadong krimen nga naglihok sa maong dapit.
Gipirmahan ni Mayor Thadeo Jovito “Jonkie” Ouano ang usa ka Executive Order niadtong Lunes, Hulyo 7, 2025, nga nagtukod sa Multi-Agency Task Force on Criminal Operations.
Ang maong task force gimanduan sa pag-monitor, pag-imbestigar, ug pagbungkag sa mga tago nga kalihukan sa krimen nga naghulga sa kahapsay ug moralidad sa publiko.
Pangulohan sa Mandaue City Police Office (MCPO) ang Task Force ug sakop niini ang National Bureau of Investigation–Mandaue District Office, Bureau of Fire Protection–Mandaue, Regional Anti-Cybercrime Unit VII, ug Department of the Interior and Local Government–Mandaue.
Magtudlo ang mayor og usa ka Task Force Coordinator aron maoy modumala sa koordinasyon ug pagpatuman.
Sumala sa EO, apil sa gukdon sa Task Force ang mga scam hub ug cybercrime center, illegal drug warehouses ug safehouses, illegal gambling operations, ug mga establisemento nga nalambigit sa cybersex, human trafficking, ug uban pang tago nga krimen nga sagad gipahimutang sulod sa komersyal o residential nga mga property.
Apil sa mga nag-unang katungdanan niini ang surveillance ug imbestigasyon, koordinasyon sa mga barangay, ug ang pagpagawas og closure o cease-and-desist orders alang sa mga kadudahang negosyo, inubanan sa City Legal Office ug Business Permit and Licensing Office (BPLO).
Responsibilidad sab sa Task Force ang paghupot og watchlist sa mga gidudahang propyedad, pag-andam og ebidensya alang sa prosekusyon, ug pagsumite og twice-monthly reports sa Opisina sa Mayor.
Papel sa mga Barangay
Gimanduan ang tanang 27 ka barangay sa Mandaue sa pagsuporta sa Task Force.
Ang matag barangay kinahanglang magtudlo og Anti-Crime Focal Person, magsumite og bi-monthly reports bahin sa mga kadudahang kalihukan, ug motabang sa pagpatuman sa ground.
Ang mapakyas sa pagtuman nga walay igong hinungdan mahimong i-refer sa DILG-Mandaue Field Office alang sa posibleng administrative action. / CAV