Tungod sa insidente diin gibato sa mga menor de edad ang mga sakyanan nga nangagi sa viaduct sa Cebu South Coastal Road (CSCR) niadtong Huwebes, Abril 17, 2025, si Cebu City Mayor Raymond Alvin Garcia nimando nga magtukod og task force nga mo-monitor sa lugar.
Ang grupo gilangkuban sa Cebu City Disaster Risk Reduction and Management Office, Cebu City Transportation Office (CCTO), Department of Public Services, Bureau of Fire Protection, Philippine Coast Guard, Cebu Port Authority, ug Department of the Interior and Local Government.
Apil sab sa task force mao ang City Market Office, Prevention Restoration Order Beautification Enhancement (Probe), Department of Social Welfare and Services (DSWS), South Road Properties (SRP) Management Office, Bantay Dagat, City Environmental Sanitation and Enforcement Team (Ceset), Cebu City Police Office (CCPO) Stations 5 ug 6, mga barangay sa Ermita, Pasil, ug Suba.
Daghang mga video ang nag-circulate online sukad Martes, Abril 21, 2025, nga nagpakita sa mga indibiduwal nga nagsaka sa viaduct ug naglabay og mga bato sa mga sakyanan nga milabay.
Sumala sa mga taho, ang mga indibiduwal molukso dayon sa dagat ug molangoy paingon sa baybayon aron dili masikop.
“I hope this incident will not happen again. It poses a risk not only to the vehicles that go, but also to the motorists,” matod ni Garcia atol sa regular Monday flag-raising ceremony, Abril 21, 2025.
Sa samang buntag, si Garcia nagkanayon sa usa ka press conference nga tungod kay nailhan na sa DSWS ang mga menor de edad nga nalambigit, kinahanglang makig-estorya sila sa mga ginikanan.
“Mas maayo mapatawag ang parents to let them know the gravity of the offense of their son and hopefully the parents will be with the government in disciplining their children not to do things like those anymore,” matod ni Garcia.
Sa laing bahin, si CCTO Head Raquel Arce niingon sa buwag nga pakighinabi niadtong Lunes nga ilang gitangtang ang tanang agianan sa viaduct.
Matod niya nga ang ilang grupo niputol og pisi nga gihigot sa kilid sa viaduct aron ma-access.
Matod ni Arce nga ang responsibilidad naa sa mga ginikanan sa mga menor de edad nga mga indibiduwal, ug gidugang nga posible nga mapasaka ang kaso kon adunay pagpabaya sa katungdanan sa mga ginikanan.
“Inyo gyud ning mga responsibility, ayaw itugot nga ang mudisiplina sa imong anak laing tao, kon kinahanglanon mapugos gyud mi og dispilina then mupasang-at sad mi og kaso batok sad ninyo sa inyong pagpabaya sa inyong responsibilidad sa inyong mga bata,” matod ni Arce.
Giawhag sab ni Arce ang mga motorista nga magpabiling mabinantayon ug gamiton ang social media sa pagtaho sa mga awtoridad bahin sa panghitabo. / JPS