Pwerting mahay sa usa ka tattoo artist human nga ang iyang gibaligyaan sa ilegal nga drugas usa diay ka polis nga nagpatuo nga customer atol sa buy-bust alas 9:29 sa gabii, Biyernes, Agusto 1, 2025 sa Ybañez Street, Barangay Mambaling, Dakbayan sa Sugbo.
Ang nasikop giila nga si Troy Tejamo Namanas, 24, tattoo artist nga taga Sitio Huyong-Huyong, Alaska Barangay Mambaling.
Nakuha sa mga sakop sa City Drug Enforcement Unit sa Cebu City Police Office (CCPO) ang mga pinutos sa gituohang shabu nga motimbang og 50 gramos nga dunay standard drug price nga P340,000.
Gitudlo si Namanas nga high value individual tungod kay dinaghan ang iyang mabaligya sa ilegal nga drugas.
Ang kapulisan nag-monitor sa kalihukan ni Namanas sa dihang siya ang gitudlo nga tinubdan sa illegal nga drugas sa Mambaling.
Sulod sa pipila ka semana ilang nakuha ang numero niini ug gi-transact nga mopalit og shabu ug gilusad dayon ang buy-bust nga niresulta sa pagkasikop niini.
Ang mga nakuha nga ebidensya giduso na sa CCPO Forensic Unit alang sa himuon nga chemical analysis. Giandam na ang kasong kalapasan sa Section 5 ug 11, Article II, Republic Act 9165 ang ipasaka sa CCPO batok sa suspek. / AYB