Gitanggong sa buhatan sa Traffic Enforcement Unit (TEU) sa Cebu City Police Office (CCPO) ang usa ka 41-anyos nga taxi driver human gireklamo sa iyang pasahero nga napangos kay wala pa gani makanaog, nipadagan na sa iyang unit.
Nahitabo ang maong insidente mga alas 9:50 sa buntag niadtong Hulyo 21, 2025, atubangan sa usa ka hotel sa Luzon Avenue corner Archbishop Reyes Avenue, Dakbayan sa Sugbo.
Ang gipadakop mao si alyas Vestre, minyo, taga Barangay Guadalupe, Siyudad sa Sugbo.
Samtang ang nireklamo nga pasahero mao si alyas Angel, 51-anyos, minyo, nagpuyo sa Barangay Sangat, Lungsod sa San Fernando.
Sa imbestigasyon sa TEU, nisaysay ang biktima nga duna siya’y kuyog laing upat ka babaye ug nakadesidir sila nga mosakay og taxi paingon sa Baseline Premiere Condominium.
Gipara nila ang drayber nga si Vestre ug sa ilang pagsakay magpapuno kini og P150 pesos sanglit lima sila kabuok mosakay.
Mao kini ang hinungdan sa ilang panaglalis kay wa magkasinabot, ang anaa sa front seat unang nanaog ug nisunod si Angel.
Apan wala pa hingpit nga makanaog si Angel, nipadagan na ang drayber hinungdan nga nasukamod ang biktima nga niresulta sa pangos sa iyang tuhod, siko ug likod nga bahin.
Ang biktima desidido mopasaka og kaso batok sa drayber ug posibleng mag-atubang kini og kasong Reckless Imprudence Resulting in Physical Injury. / JDG