PATAY nang napalgan ang 47-anyos nga taxi driver diha sulod sa gimaneho nga taxi unit nga gituohang gitulis sa wala pa mailhing mamumuno, sa hawanan sa Sitio Ka-Isko, Barangay Mactan, Dakbayan sa Lapu-Lapu niadtong sayo sa buntag, Miyerkules, Hulyo 2, 2025.
Giila ang biktima sa iyang anak ug asawa nga si Johny Burdas nga taga Barangay Bankal, Lapu-Lapu City.
Matod pa ni Police Lieutenant Colonel Christian Torres, tigpamaba sa Lapu-lapu City Police Office, nga gitu-ohang pasado alas 2:00 sa kaadlawon nahitabo ang insidente ug nadiskubrihan ang biktima pasado alas 6:00 na sa buntag.
Gituohan nga ang mamumuno nagpakaaron-ingnon nga pasahero nga nisakay sa maong taxi ug nagpahatod sa wala pa mahibaw-i nga direksyon sanglit nagdagan pa ang taxi meter.
GISIGURO’G PATAY
Nagkanayon sab si Torres nga posibleng nikanaog ang maong gunman ug gipusil ang biktima samtang diha sa gawas hinungdan nga nabuak ang windshield sa driver’s side.
Naigo sa ulo ang biktima ug giusban og pusil tumong sa iyang dughan nga dul-it gamit ang .45 nga armas.
Dihang gisusi sa mga polis ang sulod sa taxi, giingong nawala ang pitaka ug cellphone sa biktima hinungdan nga gidudahan nga gitulis.
Taliwa niini, gikonsiderar sab ang ubang nga anggulo lakip na ang posibilidad nga kaila ra ang mamumuno sa biktima o adunay personal grudges.
Nipasalig ang kapulisan nga palawman pa ang imbestigasyon.
KAADLAWON MOGIKAN
Sigon ni Kyra Burdas, anak sa biktima nga naandan na sa iyahang amahan nga mokigan sa ilang balay ala 1:00 pasado sa kaadlawon ug magpaabot lang kini nga adunay mo-booked nga pasahero.
Si Burdas gatuo nga gitulis ang iyang amahan sanglit wala siyay nahibaw-an nga aduna kini kontra.
Gisubay sa mga imbestigador ang mga CCTV camera aron sa pag-ila sa responsabli sa kamatayon sa maong drayber. / JDG