NADANGAT sa tambalanan ang usa ka taxi driver human siya gitulis ug gidunggab sa makadaghang higayon sa duha niya ka pasahero sa Sitio Laguna 2, Barangay Bulacao Pardo, Dakbayan sa Sugbo, sa alas 5:30 sa buntag, Sabado, Marso 15, 2025.
Ang biktima giila nga si Glicerio Mier, 53, taga Sitio Tagaytay, Barangay Vito, Lungsod sa Minglanilla, Cebu nga nagmaneho sa CTC taxi nga nagdala sa plate number nga VR7523.
Si Mier nakaangkon og samad dingunggaban sa bukobuko ug ilok sa dihang giduslak sa iyang pasahero nga nagdala og kutsilyo.
Matod sa biktima nga nahinabi sa DyHP RMN Cebu nga mipara ug misakay ang duha ka suspetsado sa usa ka imnanan sa dalan Pelaez, Barangay Kamagayan gikan sa usa ka imnanan sa maong lugar.
Ang nagpakaaron-ingnon nga pasahero ang nagpahatod sa Sitio Laguna, Barangay Bulacao Pardo, apan pag-abot sa ngitngit nga lugar kalit lang siya nga gitionan og kutsilyo sa iyang tupad diha sa frontseat dayon deklarar og tulis, dayon gidunggab sa iyang buko-buko ug ilokan ang drayber.
Samtang ang laing lalaki nga diha sa backseat ang mi-headlock sa liog sa drayber ug nipugos kaniya sa pagpahayang.
Taliwala sa iyang mga samad misukol ang biktima pinaagi sa pagkupot sa kamot sa lalaki nga nagdala og kutsilyo hangtod nga nabuhian.
Atol sa kaguliyang ang usa sa mga tulisan ang mikuha sa iyang bag ug gibunlot pa ang yawe sa taxi, dayon sibat.
Nasayran nga sulod sa bag sa biktima mao ang iyang kita sa tibuok adlaw nga pamasada nga iyang gibanabana nga anaa sa dul-an P6,000 ug nadala pa ang iyang pitaka nga naa ang iyang lisensya.
“Ang katong lalaki sa luyo gituok kog maayo, ang usa sigeg lusak nako katong sa atubangan nga naay kutsilyo niya ako man nakuptan ang kamot niya akong gihapak maong nabuhian ang kutsilyo,” matod ni Mier.
Sa dihang gi-review ang dashboard camera sa taxi nailhan ang duha ka mga tulisan nga mga batan-ong magsuon nga giila nga sila si Ronilo ug John Lloyd Lantape, taga Barangay Bulacao Pardo.
Nagtuo ang taxi driver nga nakagamit og illegal nga drugas ang duruha tungod sa matod pa ka agresibo niiini nga mopatay.
Giingong ang maong mga suspetsado maoy responsable niadtong pagdunggab sa batan-on sa Poblacion Pardo samtang nagbarog ang biktima nga nagduwa niadtong higayona og cellphone sa usa ka waiting shed nga miresulta sa kamatayon.
Milusad na og manhunt operation ang Inayawan Police Station sa duha. /AYB