Pormal nga gihangyo ni Mayor Amos Edwin Cabahug, Lungsod sa Balamban ang Cebu Police Provincial Office (CPPO) alang sa dugang walo ngadto sa 10 ka police officer aron tahasan pagsulbad sa nagkagrabeng problema sa Transcentral Highway (TCH).
Sa usa ka suwat pinetsahan og Hulyo 18, 2025, nga gipadala ngadto kang CPPO Acting Director Police Colonel Christopher Bermudez, gibutyag ni Mayor Cabahug ang kaway katakos sa ilang mga polis sa pagsulbad sa problema tungod sa kakuwang sa ilang personahe ug sa kalayo sa highway.
Ang TCH, usa ka importanteng agianan nga nagkonektar sa Balamban ug Cebu City, nga nahimong sentro sa mga pasundayag sa motorsiklo, illegal nga drag racing, ug mga panagtapok, ilabi na panahon sa gabii.
Kining mga kalihukan nakahatag og dakong kasamok sa mga residente ug mga nagbiyahe. Gilista sa suwat sa mayor ang pipila ka nag-unang gikabalak-an:
○ Mga bangga sa sakyanan tungod sa sobrang pagpakusog ug wa pagsunod sa mga lagda sa trapiko.
○ Illegal nga pagparking sa mga sakyanan, ilabi na sa mga likoanan nga dili makita.
○ Illegal nga drag racing, nga sagad giubanan sa ilegal nga sugal.
Sobrang kasaba gikan sa mga motorsiklo nga adunay illegal nga giusab nga tambutso, nga makasamok sa kalinaw sa mga residente sa dapit ug usahay mosangpot sa komprontasyon.
Gipasabot ni Mayor Cabahug nga ang sitwasyon nilapas na sa kapasidad sa mga awtoridad sa barangay ug munisipyo, ug giawhag niya ang provincial police nga magpadala og usa ka team nga magpatrolya ug mopatuman sa mga regulasyon sa TCH, ubos sa pagdumala sa Balamban Municipal Police Station.
Gikompirmar sa CPPO ang pagkadawat sa suwat niadtong Hulyo 18, 2025.
Kining hangyo subay sa bag-o lang nga balaudnon ni Mayor Cabahug aron ma-regulate ang level sa kasaba ug limitasyon sa pagpadagan sa TCH.
Niadtong Hulyo 11, gisumiter niya ang gisugyot nga balaudnon uban ang “Certificate of Urgency” sa lokal nga Sangguniang Bayan. / CDF