Gipangulohan ni Filipino cue artist Carlo Biado ang dominasyon sa Team Asia batok sa Team Europe sa ikaduhang adlaw nga dinumbolay sa Reyes Cup kagahapon, Huwebes, Oktubre 17, 2024 sa Ninoy Aquino Stadium.
Si Biado, kinsa maoy 2021 US Open champion, nipukan ni Mickey Krause, 5-3, sa singles event aron tuldokan ang pagbutlog sa Team Asia batok sa Team Europe, 4-0.
Lakip ang dinumbolay sa premirong adlaw, ang Team Asia nga nakaposte na og dakong labaw sa series, 7-2.
Ang gitawag og “The Black Tiger” nipahimulos sa sipyat ni Krause sa 7th rack ug wala siya’y giusik nga kahigayunan aron angkunon ang daog.
Ningposte sab og 5-3 nga daog ang Team Asia sa team play.
Si Ko Pin Yi sa Chinese Taipei nihatag sab og laing daog sa Team Asia sa singles event batok ni Sanchez Ruiz, 5-2.
Ang Team Asia nidaog sab sa doubles event, 5-2.
Ning puntoha, dako na og purohan ang Team nga maangkon ang titulo sa ikatulo ug katapusang adlaw sa kompetisyon nga gipahinungod ni Filipino billiards legend Efren “Bata” Reyes. / ESL