Balanseng ataki ang gihimo sa Team USA aron ipanglampornas ang Brazil, 122-87, sa ilang basketball men’s quarter-final game sa Paris Olympics sa Miyerkules sa kadlawon, Agusto 7, 2024 (PH time).
Tanang 12 ka mga sakop sa Team USA nakatampo sa opensa ug katunga ang ningmugna og dobleng numero nga puntos pinangulohan sa 18 si Devin Booker.
Si Anthony Edward nidugang og 17 alang sa Team USA, niamot og 14 si Joel Embiid, nihatag og 13 si Anthony Davis, 12 kang LeBron James ug 11 kang Kevin Durant.
Makabungog nga 21-2 run sa Team USA nga nagsugod sa nahabiling 3:56 minutos sa 2nd quarter maoy nakapausab sa dagan sa duwa diin gidominar na sa mga Amerikano ang kombati hangtod na sa katapusang gutlo.
Ang Team USA ning-abante sa semi-finals diin ilang ikaharong ang Serbia, nga gipangulohan ni Denver Nuggets supertar Nikola Jokic.
SERBIA 95, AUSTRALIA 90 (OT)
Nakaabante sa semi-finals ang Serbia pinaagi sa overtime nga kadaugan batok sa Australia sa pagsugod sa top 8 knockout stage.
Si Jokic, kinsa kasamtangang three-time MVP sa National Basketball Association (NBA), maoy nangulo sa Serbia pinaagi sa iyang 21 puntos ug 14 rebounds samtang nidugang og 17 puntos si Bogdan Bogdanovic.
Ang Serbia nalubong og 24 puntos sa 1st half nga hinayhinay nilang gipapha aron iposte ang makutas nga kadaugan.
Ang Australia gipangulohan ni Patty Mills pinaagi sa iyang 26 puntos samtang niamot og 25 puntos si Josh Giddey.
FRANCE 82, CANADA 73
Gipakaging sa host France ang usa sa mga inilog sa kompetisyon nga mao ang Canada, 82-73, sa laing quarter-final game.
Ang France nakamaneho pagtapak sa talagsaong ubos nga kontribyusyon sa ilang pambatong sentro nga si Victor Wembayama, kinsa igo lang nakahimo og pito ka mga puntos.
Si Guerschon Yabusele maoy nangulo sa France pinaagi sa iyang 22 puntos samtang niamot og 20 puntos si Isaia Cordinier.
Ang Canada gipangulohan ni Shai Gilgeous-Alexander pinaagi sa iyang 27 puntos samtang nitampo og 16 puntos si RJ Barrett.
Sa semis, ikaharong sa France ang FIBA World Cup champion Germany.
GERMANY 76, GREECE 63
Nakasulod sa semi-finals ang Germany pinaagi sa pagbuntog sa Greece nga gipangulohan ni kani NBA MVP Giannis Antetokounmpo.
Nagkumboya ang tanang mga sakop sa Germany aron angkunon ang kadaugan.
Gipangulohan ni Franz Wagner ang Germany pinaagi sa iyang 18 puntos samtang niamot og 13 puntos si Dennis Schroder.
Ang Greece gipangulohan ni Antetokounmpo pinaagi sa iyang 22 puntos. / AP