Humanon sa Team USA ang ilang tahas sa group stage pinaagi sa pagpakigbatok sa Puerto Rico sugod karong alas 11:15 sa gabii sa Sabado, Agusto 3, 2024 (PH time) sa men’s basketball sa Paris Olympics.
Kon buot huna-hunaon, wala na’y bili kining kombatiha alang sa Team USA gumikan kay naseguro na man nilang daan ang No. 1 nga puwesto sa Group C human nila gipangbuntog ang Serbia ug South Sudan sa nag-una nilang duha ka mga tahas.
Apan labing seguro, dili molugak ang Team USA aron magpabiling taas ang ilang morale sa ilang pagsulod sa knockout quarter-finals.
Ning duwaa, gilaumang ibalik ni Team USA coach Steve Kerr ang iyang orihinal nga starting five nga gilangkuban nila ni LeBron James, Stephen Curry, Jrue Holiday, Devin Booker ug Joel Embiid.
Ang Team USA nagtinguha nga maangkon ang ilang ikalimang sunodsunod nga Olympic gold sa Paris Games. / ESL