Tataw na ang pagbalik og duwa ni LA Tenorio sa Brgy. Ginebra Gin Kings sa umaabot nga Philippine Basketball Association (PBA) Commisioner’s Cup, matod ni Ginebra team manager Alfrancis Chua.
Ang gitawag og “Tinyente” wala sa inisyal nga lista sa lineup sa Gin Kings nga gipagawas sa PBA niadtong Martes, Oktubre 17, 2023 apan gibutyag ni Chua nga gitagaan na og pagtugot si Tenorio sa mga doktor nga mobalik pagduwa.
“Yeah, binigyan na ng go signal ng doktor yun,” matod ni Chua kabahin sa estado ni Tenorio.
Sa niaging buwan, opisyal na nga gianunsyo nga cancer-free na si Tenorio human sa pila ka mga buwan nga pagpakigbatok sa maong sakit.
Gani nikuyog na si Tenorio sa kampanya sa Gilas Pilipinas sa bag-uhay lang nahuman nga 19th Asian Games sa Hangzhou, China isip usa sa mga assistant ni coach Tim Cone.