Nadiskubrehan sa kapulisan nga ang mga ilegal nga armas nga ginama sa Danao City, Sugbo nga maoy kuhaan og suplay sa giingong terorista sa dihang nasuta nga ang mga armas nasakmit gikan sa usa ka Indonesian national nga giila nga terorista, napalit sa maong siyudad.
Moabot sa 15 ka illegal gun manufacturing sites ang malampusong nabungkag sa hiniusang operasyon sa Police Regional Office (PRO) 7, Regional Mobile Force Battalion, ug Danao City Police Station, sugod niadtong Marso 21, 2025, hangtod kagahapon, Mayo 20, 2025.
Gikan sa buy-bust operation niadtong Marso 21, 2025, sa Barangay Suba, nisangpot sa sunodsunod nga ronda sa Barangay Cahungan ug Cahumayan, sa bukirang bahin sa Danao. Ang maong mga operasyon niresulta sa pagkasakmit sa minilyon ka pesos nga balor sa mga makina, materyales, ug wala pa nahuman nga mga paltik nga pistola.
Matod ni Police Brigadier General Redrico Maranan, hepe sa kapulisan sa PRO 7, gituyo sa mga ilegal nga gun manufacturer nga sa bukirang dapit nipahimutang aron dili dali masakpan. Gipasabot sab niya nga gipatutokan ang pagpuhag sa ilegal nga paghimo og armas sa Danao tungod kay 80 porsiyento sa tanang loose firearms nga nasakmit sa nagkadaiyang operasyon sa kapulisan sa tibuok rehiyon ang naggikan sa Danao.
Dugang pa niya, dako og natabang ang pagbungkag sa mga ilegal nga gun manufacturing sites sa pagluwas og daghang kinabuhi. Base sa datos sa PRO 7 niadtong 2024, makatala ang kapulisan og kapin sa 35 ka kaso sa pagpamusil matag buwan. Apan sukad gipahugtan ni Maranan ang kampanya batok sa loose firearms, nikunhod kini ngadto na lang sa tulo ka kaso sa pagpamusil matag adlaw.
TERORISTA
Sa lawom nga imbestigasyon sa PRO 7, dinhi nasayran nga dili lang lokal ang mga kustomer sa mga gun manufacturer sa Danao, sanglit naabot na usab kini sa mga kamot sa terorista.
Nahibaw-an nga usa ka Indonesian National nga giila nga terorista sa ilang nasod, si Anton Nowera Gobay, uban sa duha ka Pinoy nga silang Jummy Desales Abolde ug Michael Notarte Tino, nadakpan niadtong Enero 7, 2022, sa mga personahe sa 1204th Maneuver Company, Regional Mobile Force Battalion sa Barangay Nalus, Lungsod sa Kiamba, Sarangani Province.
Nakuha gikan kanila ang daghang tag-as nga kalibre sa armas nga gisakay sa usa ka van gikan sa Cagayan de Oro, ug gitakdang isakay sa motorbanca paingon sa Indonesia. Sa imbestigasyon, nitug-an ang mga suspek nga ang maong mga armas nga mobalor og P500,000, napalit nila sa Danao City ug gisakay sa barko paingon sa Cagayan de Oro.
Si Gobay giingong sakop sa Papuan National Army ug Free Papua Organisation, usa ka separatist group sa Indonesia, ug nalambigit sa teroristang pagpangatake sa maong nasod.
Ang imbestigasyon nagpakita nga si Gobay niabot sa Pilipinas niadtong Enero 17, 2015, ug mibalikbalik sa nasod, lakip na ang pagtuon isip licensed aircraft pilot. Nagsugod siya sa pagpangita og daghang armas nga iyang dad-on sa Indonesia, ug usa ka drayber nga giila nga si Mr. Perez ang nitanyag kaniya og duha ka M16 Armalite Rifle nga nagkantidad og P300,000.
Human na-scam sa laing transaksyon, nakadawat si Gobay og impormasyon nga dunay tigbuhat og armas sa Cebu nga barato. Nilupad siya paingon sa Sugbo niadtong tunga-tunga sa Nobiyembre 2022 ug nakigtagbo sa usa ka alyas Cesar sa Danao. Nipalit siya og 10 ka Colt AR-15 caliber 9MM PARA Rifle sa kantidad nga P50,000 matag usa, duha ka Ingram sub-machine pistols, ug mga bala, nga nibayad og P500,000.
Aron maseguro ang pagpalusot sa mga armas agi sa backdoor sa Mindanao. / AYB