Gimando sa korte sa Manila ang pagbalhin sa gipalagpot nga representante sa Negros Oriental nga si Arnolfo Teves Jr. ngadto sa Manila City Jail.
Matod ni National Bureau of Investigation (NBI) director Jaime Santiago, ang korte sa Manila nimando og commitment order batok kang Teves nga nagmando sa iyang detensyon sa Manila City Jail.
Si Teves kasamtangang gidetaine sa pasilidad sa NBI sulod sa New Bilibid Prison sa Muntinlupa City.
Apan matod ni Santiago, iyang gimando nga i-hold usa ang pagpatuman sa mando sa korte tungod kay si Teves nag-atubang sab og mga kaso sa ubang mga korte.
“Antayin natin ang final decision ng Manila courts. Marami eh. Para finally ma-determine namin saan namin finally i-turn over si Congressman Teves,” matod niya.
Si Teves nag-atubang og 10 ka kaso sa murder, 13 ka kaso sa frustrated murder, upat ka kaso sa attempted murder atubangan sa Manila Regional Trial Court (RTC) Branch 51; mga kaso sa murder atubangan sa Manila RTC Branch 12, Branch 15, ug Bayawan RTC Branch 63; illegal possession of firearms ug illegal possession of explosives sa Manila RTC Branch 12; ug terrorist financing, prevention, and suppression act atubangan sa Quezon City RTC Branch 77.
Niadtong Huwebes, Hunyo 5, 2025, nitambong si Teves sa arraignment sa Manila Regional Trial Court Branch 12. Ang korte nisulod og not guilty plea human gipangayo sa akusado ang iyang katungod sa pagpakahilom.
Si Teves giila nga utok sa pagpatay sa kanhi gobernador sa Negros Oriental nga si Roel Degamo, uban sa ubay-ubay pang inosenteng sibilyan sa hayag nga adlaw niadtong Marso 4, 2023. Nag-atubang sab siya og kasong murder kalabot sa pagpatay sa tulo ka indibiduwal sa probinsiya niadtong 2019, lakip na si Miguel Dungog, kanhi board member sa Negros Oriental.
Si Teves gidakop sa Dili City, Timor Leste niadtong Mayo 27. / TPM / SunStar Philippines