ANDAM na nga ma-discharge gikan sa ospital ang gipalagpot nga magbabalaod nga si Arnolfo “Arnie” Teves Jr.
Sa usa ka pamahayag, gibutyag sa legal counsel ni Teves nga si Ferdinand Topacio nga gihatagan og pagtugot ang kanhi representante sa Negros Oriental nga makagawas na sa Philippine General Hospital niadtong Martes, Hulyo 1, 2025.
Gipaubos si Teves sa appendectomy niadtong Hunyo 18.
Matod ni Topacio, ibalik si Teves sa iyang selda sa Camp Bagong Diwa sa Taguig City.
Gidugang niya nga magpabilin nga bantayan ang kahimtang sa kanhi kongresista tungod kay nagpadayon pa ang pagsakit sa iyang tiyan.
Si Teves nag-atubang og 11 ka kaso sa pagpatay, 13 ka kaso sa frustrated murder, upat ka kaso sa attempted murder, illegal possession of firearms ug illegal possession of explosives, ug terrorist financing, prevention, ug suppression act.
Gitumbok siya nga utok sa pagpatay kang Negros Oriental Governor Roel Degamo, uban sa ubay-ubay pang inosenteng sibilyan sa hayag nga adlaw niadtong Marso 4, 2023, ug tulo ka laing indibidwal sa probinsya niadtong 2019, lakip na si Miguel Dungog, kanhi board member sa Negros Oriental. / TPM/SunStar Philippines