Marvin G. Quilaquil / Nagsuwat
Mga hulagway: Marvin G. Quilaquil, FB page sa Lacson Ruins/The Ruins, Talisay City
Dili matukib ang akoang kalipay sa dihang gihimo kong usa sa mga candle sponsors sa kasal nilang Brother John Dave Amarante ug ni Sister Wensie Delos Reyes — Amarante niadtong Hulyo 10, 2025, tungod kay sila akong mga kauban sa Praise and Worship Team sa Mandaue Apostolic Church nga gidumala sa akong amahan nga si Pastor Leopoldo B. Quilaquil.
Grabe kaayo ang akong excitement tungod kay first time pud nako nga makasuroy sa Talisay City, Negros Occidental, labina sa “The Ruins” nga mao ang venue sa kasal.
Para gud nako, ang The Ruins kay usa ka mansion nga puno sa gugma ug grasya.
Nganong puno sa Gugma?
Sa akong pagtuyok-tuyok sa building, daw nakahilak ko sa akong nasayran nga natukod kini isip timaan sa dakong gugma ni Don Mariano Ledesma Lacson ngadto sa nitaliwan niya nga asawa nga si Maria Braga kinsa namatay niadtong 1911. Ang mansion kay ginama susama sa Italian architecture ug gituyo g’yud og design agi'g timaan sa way sama ug way makakumpara nga panaghigugmaay nila sa usa'g-usa.
Nganong puno sa grasya?
Dako kaayong grasya nga gihatag sa Diyos sa mansion tungod niadtong bisperas sa Ikaduhang Gubat sa Kalibutan, ang mansyon gisunog sa mga gerilya ug nagdilaab kini sulod sa tulo ka adlaw ug nagbilin kini’g dakong remembrance sa mahimayaong kagahapon sa lugar maingon man kabahin kini sa estorya sa atoang nasod.
Sa akong pagkakita sa nahangabiling istruktura, daw gikumot ang akong kasing-kasing samtang nagpasalamat sa kamaayo sa Diyos tungod kay giila kining mansion isip usa sa 12 ka most fascinating ruins sa tibuok kalibutan, The Taj Mahal of Negros ug usa sa best landmarks sa atong nasod. Isip usa ka Filipino citizen, nakasyagit gud kog, I AM A FILIPINO! uban ang kalipay nga karon nakasuroy ko sa lugar nga dugay ko usab gipangandoy nga maanhian.
Unsa ang tinuod nga Ngalan sa Mansion?
Kaniadto giila ang mansion isip Balay Daco, Palasyo, Simento nga Balay, Lacsion Mansion, Mansyon maingon man nga Balay ni Anoy. Apan ang mga pinoy nga nakabisita gayud sa maong lugar ang labing nitatak nga ngalan sa mansion mao gayud ang The Ruins tungod kay mga kagun-oban, mga salin man siya sa usa ka bilding nga naguba.
Unsaon man pag-adto?
Gikan sa airport, mosakay lang kag shuttle bus padulong sa Bacolod ug sultian ang driver nga i-drop ka sa The Ruins. Makita nimo ang the ruins along the way ra padulong sa Bacolod City gikan sa airport.
Kon gikan sad ka sa Bacolod City, sakay sa airconditioned coaster paingon sa BATA ug manaog sa Acropolis Gardens/Rose Lawn. Unya, sakay og traysikol paingon sa Octagon Village ug lakaw og pipila ka metros paingon sa The RUINS. /