GIINSISTER sa developer sa The Stria, ang 11 ka andana nga mixed-use condominium ug resort project sa Barangay Poblacion, Santa Fe, isla sa Bantayan nga fully compliant sa Environmental, zoning, ug building regulations ang maong edipisyo.
Kini taliwa sa taho nga nakalapas sa balaod sa kalikupan.
Ang Fifth Avenue Property Development Corporation, developer sa proyekto niingong nga walay ilegal sa The Stria. Sa giluwatan nga pamahayag, gihimug-atan nga ang proyekto sukad sa pagsugod nahimong transparent ug gani giingon nga nipahigayon kini og Public consultations pagsiguro sa tanang required approvals ingon man ang pagluwat og mga notisya subay sa balaod.
“There is nothing illegal about the development of The Stria… There is nothing secretive about the development,” matod sa giluwatang pahayag.
Kini nga momentous subay sa nigawas nga kontrobersiya ug reklamo batok sa luxury project nga nakaabot sa buhatan sa kagamhanan sa Probinsiya sa Sugbo.
Sa pakisusi, nakalapas sa provisions sa Environmental Compliance Certificate (ECC) ang 11-storey resort.
Gisugyot sa regulators sa pagtuman lamang sa tulo ka andana nga nahisubay sa balaod nga nag deklarar usab sa tibuok Bantayan Island isip protected area.
Apan matod sa developer, bisan og adunay height considerations ubos sa 2009 DENR Department Administrative Order (DAO 2009-09) apan nag-apply lang kini sa mga government-owned properties nga gi-classify isip protected zones ug dili sa mga pribado ug tituladong yuta.
Gidugang sab niini nga walay restrictions sa land use ang maong proyekto. / ANV