Usa ka 22 anyos nga second year college student nga nag-sideline pagka ride-hailing app rider ang gisikop sa mga sakop sa Mambaling Police Station human gireklamo sa iyang babaye’ng pasahero nga usa ka message therapist nga nitulis kaniya ug niamong-among sa South Road Properties (SRP) sa alas 6 sa buntag sa Huwebes, Marso 13, 2025.
Ang suspek giila nga si alyas Jeff, 22, taga Burgos street, Barangay Poblacion, Dakbayan sa Talisay.
Matod sa biktima nga si alyas Fe, dunay kaipon, taga Barangay Tangke sa Dakbayan sa Talisay, nga nag-book siyag ride hailing app alas 3 sa kaadlawon aron magpahatod sa ilang balay gikan sa dan F. Cabahug, Barangay Kasambagan, apan dugay ni nga naabot nga maoy hinungdan nga iya na lang gi-cancel ang iyang booking.
Pipila ka gutlo ang milabay dunay usa ka habalhabal driver nga nihunong sa iyang atubangan ug ni-offer nga siya ang mohatod apan sa wala pa siya mosakay iya una nga gipiktyuran ang motor nga Yamaha Aerox nga dunay plate number (gitago una sa Superbalita Cebu).
Matod sa biktima nga samtang sakay siya sa motorsiklo mipahibawo ang suspek nga mohunong lang una pag-abot sa SRP kay mangihi ug sa dihang nisanong siya, kalit lang nideklarar og tulis ang suspek dungan sa pagtiun kaniya og screwdriver ug gihulga pa kini nga patyon kon mosukol.
Nakuha sa suspek ang iyang cellphone nga mokantidad sa P20 mil ug kwarta nga moabot sa P2,500.
Human makuha ang kwarta ug cellphone, gidala pa siya sa ngitngit nga dapit ug didto gipugos siya sa pagpau_-u_ sa kinatawo niini ug dayong lugos sa biktima.
Human nagmalampuson ang suspek, dali kini nga nisibat og gibiyaan ang biktima nga nangayo'g pakitabang sa mga motorista ug nagpahatod sa Mambaling Police Station aron itaho ang iyang gidangatan.
Nakuha pagbalik sa mga polis ang cellphone sa biktima, ang screwdriver ug motorsiklo sa suspek apan ang kwarta wala na.
Ang 29 anyos nga construction worker nga kapuyo sa biktima nga nahinabi sa Superbalita Cebu niingon nga kun siyay pabut-on ibalik ang death penalty aron maoy isilot sa suspek nga nag-among-among sa iyang kapuyo.
Gipadayag niini nga nakulbaan siya sa iyang pagbangon Huwebes sa kaadlawon pagtingog sa alarm clock.
Nigawas siya kay iyang sugaton ang iyang kapuyo gikan sa trabaho apan dugay kaayo kining naabot hinungdan sa iyang kabalaka.
Dihang nagkita sila kalit nga nalup-og ang iyang kapuyo og mihilak.
"Gigakos nako ingon siya gitulis ko, mihilak! Unya gihilabtan pa siya," matod niya.
Nangayo sila'g pakitabang sa kapulisan hangtud nga nasubay ang suspek.
Gipadayag niini nga daw nahugno siya dihang nisulti iyang kapuyo nga gihilabtan sa suspek.
Apan bisan sa nahitabo, nagpabilin silang lig-on og ipadayon nila ang kaso hangtud nga madugta sa prisohan ang suspek.
Giangkon sa suspek ang krimen ug matod niya nga nahimo niya kini aron ibayad sa iyang tuition.
Si Police Lieutenant Colonel Maria Theresa Macatangay, deputy city director for operation sa Cebu City Police Office, niawhag sa publiko hilabi na sa mga babaye nga pasahero nga ilhon ug kuhaan daan og hulagway ang ilang gisakyan nga motorsiklo o ba kaha sakyanan. (AYB, GPL)