Tataw nga nadasig sa pagkapili niya isip 2024-25 MVP, nagpakatap og 38 puntos si Shai Gilgeous-Alexander aron agakon ang host Oklahoma City Thunder sa dakong kadaugan batok sa Minnesota Timberwolves, 118-103, sa Game 2 sa Western Conference finals series sa National Basketball Association (NBA) ning Biyernes, Mayo 23 (PH time).
Niini, ang Thunder, nga maoy No. 1 overall human sa regular season, naggunit na og 2-0 nga bintaha ning best-of-seven nga engkuwentro.
Si Gilgeous-Alexander, kinsa nidawat sa iyang labing unang MVP trophy gikan ni Commissioner Adam Silver sa usa ka hamubong seremonya sa wala pa nagsugod ang duwa, niangkon nga nakahatag kaniya og dugang kadasig ang nadawat niyang labing taas nga individual award.
“I feel like all my emotions were so high, but I was a little bit tired out there, especially at the start,” matod ni Gilgeous-Alexander nga napatik sa AP News.
“I was a little too juiced up. Special moment. I’m happy we won so I can really enjoy the last couple days and soak it up. That really helps.”
Si Jalen Williams nidugang og 26 puntos samtang niamot og 22 puntos si Chet Holmgren alang sa Thunder.
“When you win games, you do it together and you have fun out there, everything else -- all the individual stuff you want -- it comes with it,” dugang ni Gilgeous-Alexander.
Ang Timberwolves gipangulohan ni Anthony Edwards pinaagi sa iyang 32 puntos, nidugang og 22 puntos si Jaden McDaniels samtang niamot og 17 puntos si Nickeil Alexander-Walker.
Dili pa tantong linubnganay ang kombati sa nag-unang duha ka quarters apan pagsugod sa 3rd quarter, inanay na nga gipaburot sa Thunder ang ilang labaw hangtod nga hingpit nilang nakontrolar ang duwa.
Ang series motapon sa korte sa Timberwolves sa magsunod duha ka mga duwa.
Puntos matag usa:
Oklahoma City (118) - Gil-geous-Alexander 38, Williams 26, Holmgren 22, Dort 9, Caruso 9, Wallace 8, Hartenstein 6.
Minnesota (103) - Edwards 32, McDaniels 22, Alexander-Walker 17, Reid 10, Divincenzo 8, Randle 6, Gobert 5, Conley 3. / Gikan sa wires