Ningbangon gikan sa 29 puntos nga pagkalubong ang Oklahoma City Thunder aron usban pagbuntog ang hosts Memphis Grizzlies, 114-108, sa Game 3 nga maoy naghatag kanila og dominanteng 3-0 nga bintaha sa ilang Western Conference 1st round playoffs series sa National Basketball Association (NBA) ning Biyernes, Abril 25, 2025 (PH time).
Pagsugod sa kombati, ningratsada dayon ang opensa sa Grizzlies hangtod nga nakaposte sila og 27 puntos nga labaw, 67-40, sa hinapos nga bahin sa 2nd quarter.
Apan human niini, nakasinati og hip injury ang lider sa Grizzlies nga si Ja Morant ug wala na kini nakabalik pagduwa.
Taliwala niini, nainat pa sa Grizzlies ang ilang labaw ngadto sa 29 puntos, 69-40, sa nahabiling 3:07 sa 2nd quarter.
Apan sa pagbiya ni Morant, tataw nga nausab ang dagan sa duwa sa Grizzlies ug gipahimuslan kini sa Thunder aron sugdan ang pagbangon gikan sa grabeng pagkalubong.
Ang hingpit nga pagbangon gikan sa 29 puntos nga pagkalubong maoy ikaduha sa labing dako nga nahitabo sa postseason sukad nga gisugdan pagrekord ang play-by-play data niadtong 1996-97 season.
Ang nag-una lang niini mao ang pagbangon sa Los Angeles Clippers gikan sa 31 puntos nga pagkalubong batok sa Golden State Warriors niadtong Abril 15, 2019.
Gimugna ni Chet Holmgren sa 2nd half ang 23 sa iyang kinatibuk-ang 24 puntos aron pangulohan ang pagbangon sa Thunder, nga nakadawat og 31 puntos gikan ni Shai Gilgeous-Alexander ug 26 puntos gikan ni Jalen Williams.
Ang Grizzlies gipangulohan ni Scotty Pippen Jr. pinaagi sa iyang 28 puntos, nihatag og 22 puntos si Jaren Jackson Jr. samtang nitunol og 15 puntos si Morant.
Sa laing bahin, nakaposte og 2-1 nga bintaha sa laing 1st round series ang hosts Los Angeles Clippers ug New York Knicks human nila gipangpukan ang ilang tagsatagsa ka kontra sa Game 3.
Ang Clippers ningmakmak sa Denver Nuggets, 117-83, sa Western Conference samtang gipatapsingan sa Knicks ang Detriot Pistons, 118-116, sa Eastern Conference. / AP