Ning-abante sa Western Conference finals ang host Oklahoma City Thunder human nila gipangtaktak ang Denver Nuggets, 125-93, sa deciding Game 7 sa playoffs 2nd round series sa National Basketball Association (NBA) sa Lunes, Mayo 19, 2025 (PH time).
Ning maong bangis nga daog, nakuha sa Thunder ang katungod sa pagpakigbatok sa Minnesota Timberwolves sa Western Conference finals series.
Mao kini ang labing unang higayon gikan niadtong 2016 nga nakaabot ang Thunder ning puntoha.
Sama sa naandan, ang Thunder gipangulohan ni Shai-Gilgeous-Alexander pinaagi sa iyang 35 puntos samtang nidugang og 24 puntos si Jalen Williams.
Grabe ka nindot sa gipakitang duwa ni Gilgeous-Alexander diin nirehistro siya og 12-of-19 shooting, tulo ka steals ug wala siya’y nahimong turnover.
Kanunay nga naglabaw og duha ka mga numero ang Nuggets sa 1st quarter una nimugna og 13-0 nga rally ang Thunder aron angkunon ang labaw sa labing unang higayon, 27-26, sa sayong bahin sa 2nd quarter.
Human niini, inanay nga gipaburot sa Thunder ang ilang labaw hangtod nga hingpit na nilang nakontrolar ang kombati.
“There’s not many games, you wake up in the morning and you know that you’re going to remember the game for the rest of your life, and Game 7 is one of them,” matod ni Thunder coach Mark Daigneault nga napatik sa AP News.
“To be able to focus through that and perform the way these guys did today was very impressive.”
Ang Nuggets gipangulohan ni Nikola Jokic pinaagi sa iyang 20 puntos, niamot og 19 puntos si Christian Braun samtang nitampo og 13 puntos si Jamal Murray.
Puntos matag usa:
Oklahoma (125)-Gilgeous-Alexander 35, Williams 24, Holmgren 13, Caruso 11, Hartenstein 10, Wiggins 8, Wallace 7, Dort 6, Joe 5, Mitchell 5, Williams 1.
Denver (93)- Jokic 20, Braun 19, Murray 13, Gordon 8, Westbrook 6, Porter Jr. 6, Strawther 6, Tyson 5, Watson 4. / Gikan sa wires