Gipakita ni Shai Gilgeous-Alexander ngano siya ang Most Valuable Player sa liga ug gialsa ang Oklahoma City Thunder sa Game 4 sa National Basketball Association (NBA) Finals.
Mipakatap si Gilgeous-Alexander og 15 sa iyang 35 puntos sa katapusang 4:38 sa duwa aron dalhon ang Thunder ngadto sa kulbahinam nga 111-104 nga kadaugan ug tablahon ang best-of-seven NBA Finals sa 2-all.
“He definitely showed who he is tonight,” sigon pa ni Thunder coach Mark Daigneault.
Ang Thunder mitapos sa duwa gamit ang 16-7 run, 15 puntos niini gibuhat sa league MVP.
“We played with desperation to end the game,” ingon ni Gilgeous-Alexander, “and that’s why we won.”
Si Jalen Williams nitampo og 27 puntos, nidunol si Alex Caruso og 20, samtang si Chet Holmgren nibuhat og 14 puntos ug 15 rebounds.
Sa habig sa Pacers, si Pascal Siakam nihatag og 20 puntos, si Tyrese Haliburton nitunol og 18 puntos ug si Obi Toppin nitampo og 17.
Nabawi sa Thunder ang homecourt advantage. Ang Game 5 ngadto ipahigayon sa Oklahoma City karong Martes.
“This kind of a challenge is going to have extreme highs and extreme lows,” matod ni Pacers coach Rick Carlisle. “This is a low right now and we're going to have to bounce back from it.”
Nasalbar sa Thunder ang ilang realistic nga tsansa sa championship. Sa kasaysayan, 37 sa 38 ka teams nga niabot og 3-1 sa Finals nakadaug sa titulo. Murag padulong na unta ang Pacers sa pagka-39, apan giluwas ni Gilgeous-Alexander ang Thunder.
“We knew it when we woke up this morning; 3-1 is a lot different than 2-2 going back home,” ingon pa sa pambato sa Thunder. / RSC