Nakamugna na sab og mabayanihong puntos si Tyrese Haliburton nga maoy nag-agak sa Indiana Pacers ngadto sa makapakaging nga kadaugan batok sa grabe ka inilog ug host Oklahoma City Thunder, 111-110, sa Game 1 sa National Basketball Association (NBA) Finals kagahapon, Biyernes, Hunyo 6, 2025 (PH time).
Si Haliburton nakapasulod og jumper sa nahabiling 0.3 segundos nga maoy nagpadaog sa Pacers. Mao ra kini ang bugtong higayon nga nakaangkon ang Pacers og labaw.
“Man, basketball’s fun. Winning is fun,” matod ni Haliburton nga napatik sa AP News.
Sulod na sab sa pipila ka mga higayon ning maong playoffs nga nakahimo si Haliburton og susama niini nga senaryo.
Niadtong Abril 29 atol sa 1st round sa playoffs, naggukod ang Pacers batok sa Milwaukee Bucks, 111-118, sa nahabiling 34.6 segundos sa overtime apan nimugna og rally ang Pacers nga gituldokan sa puntos ni Haliburton sa nahabiling 1.4 segundos ug nakuha nila ang kadaugan, 119-118.
Niadtong Mayo 6 atol sa 2nd round, ang Pacers naggukod Cleveland Cavaliers, 112-119, sa nahabiling 48 ka mga segundos ug ning-rally na sab ang Pacers. Naposte ni Haliburton ang nakapadaog sa Pacers nga puntos, 120-119, sa nahabiling 1.1 segundos.
Niadtong Mayo 21 atol sa 3rd round, naggukod na sab ang Pacers batok sa New York Knicks, 112-121, sa nahabiling 51.1 segundos. Ning-rally na sab ang Pacers ug nakapugos og overtime pinaagi sa puntos ni Haliburton. Ning maong duwa, ningdaog ang Pacers, 138-135.
Niini, gitawag na si Haliburton isip bag-ong Mr. Big Shot sa NBA.
Ning sangkaa, kanunay nga naggukod ang Pacers gikan sa sinugdanan ug nabiyaan pa sila og 15 puntos sa nahabiling 9:45 minutos sa 4th quarter.
Apan wala nawad-i og paglaom ang Pacers ug nagtutok lang kini og maayo sa duwa hangtod nga nakaposte na sab sila og makapakugang nga kadaugan.
“We’ve had lots of experience in these kinds of games,” asoy ni Pacers coach Rick Carlisle.
Puntos matag usa:
Indiana (111) - Siakam 19 points. Toppin 17, Turner 15, Haliburton 14, Nembhard 14, Nesmith 10, McConnell 9, Bryant 5, Mathurin 5, Sheppard 3.
Oklahoma (110) - Gilgeous-Alexander 38, Williams had 17, Dort 15, Caruso 11, Hartenstein 9, Wallace 6, Holmgren 6, Joe 5, Wiggins 3. / Gikan sa wires