Nagkumboya sila si Nikola Jokic ug Jamal Murray aron agakon ang Denver Nuggets sa impresibong daog batok sa host Oklahoma City Thunder, 140-127, ning Martes, Marso 11, 2025 (PH time), sa National Basketball Association (NBA).
Si Jokic nagpakatap og 35 puntos, 18 rebounds ug walo ka assists samtang si Murray nimugna og 34 puntos.
Ning-amot og 17 puntos si Michael Porter Jr. alang sa Nuggets, ningdugang og 16 puntos matag usa sila si Russell Westbrook ug Peyton Watson samtang nitunol og 14 puntos si Christian Braun.
Ang Thunder, nga maoy Western Conference leader, gipangulohan ni Lu Dort pinaagi sa iyang season-high 26 puntos, nitampo og 15 puntos si Shai Gilgeous-Alexander, nihatag og 20 puntos si Isaiah Hartenstein, nidugang og 13 puntos si Alex Caruso samtang ningtunol og 12 puntos matag usa sila si Jalen Williams ug Cason Wallace.
Si Williams, kinsa nahimong All-Star sa labing unang higayon ning maong season, nakasinati og angol (right hip strain) sa 2nd quarter ug wala na kini nakabvalik pagduwa.
Taliwala niini, nakamaneho gihapon ang Thunder pagposte og 73-67 nga labaw sa halftime.
Gipahimuslan sa Nuggets ang pagkawagtang ni Williams ug nailog nila ang labaw, 101-99, pagkahuman sa 3rd quarter.
Nagpadayon ang kainit sa Nuggets hangtod nga nainat nila ang ilang labaw ngadto sa 125-111 sa nahabiling 6:42 minutos.
Human niini, wala na nius-os sa usa ka numero ang labaw sa Nuggets hangtod na sa katapusang gutlo. / AP