Bangis nga gibawsan sa host Oklahoma City Thunder ang Indiana Pacers, 123-107, sa Game 2 aron tablahon ang National Basketball Association (NBA) Finals best-of-seven series, 1-1, sa Lunes, Hunyo 9, 2025 (PH time).
Sama sa ilang sakit nga pagkapilde sa Game 1, ang Thunder nakaposte sab og dakong labaw sa 1st half apan ning higayuna ilaha na nga gipaniguro nga dili kini mausik.
Gipangulohan na sab ni Shai Gilgeous-Alexander ang Thunder pinaagi sa iyang 34 puntos ug ning higayuna, nakadawat siya og dakong suporta gikan sa iyang mga kauban ang kasamtangang MVP.
Ang Thunder nakadawat sab og 20 puntos gikan ni Alex Caruso, 19 puntos gikan ni Jalen Williams, 18 puntos gikan ni Aaron Wiggins, ug 15 puntos gikan ni Chet Holmgren.
“We did some things good tonight. We did some things bad,” matod ni Gilgeous-Alexander nga napatik sa AP news. “We’ve got to be able to get better and be ready for Game 3.”
Ang Pacers nga ningpapha sa 15 puntos nga labaw sa Thunder sa 4th quarter sa Game 1 aron angkunon ang makapakugang nga kadaugan, 111-110, adunay pito ka mga magduduwa nga nakamugna og dobleng numero nga puntos apan walay bisan usa nga nakaabot og 20 puntos.
Mao kini ang labing unang higayon gikan niadtong 2013 nga wala’y nakahimo og 20 puntos sa usa ka team sa nag-unang duha ka mga duwa sa NBA Finals.
Ang Thunder ningmugna og 19-2 run sa 2nd quarter aron pagposte og 23 puntos nga labaw, 42-29.
Human niini, wala na nakabangon pagbalik ang Pacers hangtod na sa katapusang gutlo.
“A bad first half, obviously, was a big problem,” matod ni Pacers coach Rick Carlisle. “And we just played poorly.”
Puntos matag usa:
Oklahoma (123) - Gilgeous-Alexander 34, Caruso 20, Ja. Williams 19, Wiggins 18, Holmgren 15, Wallace 4, Dort 3, Hartenstein 3, Williams 3, Mitchell 2, Joe 2.
Indiana (107) - Haliburton 17, Turner 16, Siakam 14, Mathurin 14, Nesmith 14, Nembhard 11, McConnell 11, Sheppard 3, Toppin 3, Bryant 1. / Gikan sa wires