Thunder miihaw sa Grizzlies

Gipanglubong og taga liog sa No. 1 overall ug host Oklahoma City Thunder ang Memphis Grizzlies, 131-80, sa Game 1 sa ilang Western Conference 1st round playoff series sa National Basketball Association (NBA) ning Lunes, Abril 21, 2025 (PH time).

Ang 51 puntos nga biya maoy ikalimang labing dako nga daog sa postseason sa kasaysayan ug labing dako nga daog sa Game 1.

Niabot og 58 puntos ang labing dakong daog sa kasaysayan sa offseason ug kaduha kini nahitabo.

Una kining nahi­tabo kaniadto pang 1956 dihang gimakmak sa Minneapolis Lakers ang St. Louis Hawks, 133-75.

Nahitabo ki­ni pagbalik niadtong 2009 dihang gipanglampornas sa Denver Nuggets ang New Orleans Pelicans, 121-63.

Ning kombatiha, dili si Shai Gilgeous-Alexander maoy nibida sa Thunder kon dili ang ilang reserve player nga si Aaron Wiggins, kinsa nagpakatap og 21 puntos.

Si Jalen Williams nidugang og 20 puntos samtang niamot og 19 puntos ug 10 rebounds si Chet Holmgren alang sa Thunder.

Si Gil­geous-Ale­xander, kinsa maoy NBA scoring leader sa iyang average nga dul-an sa 33 puntos, igo lang niamot og 15 puntos ning kombatiha.

“We played to our identity,” batbat ni Gil­­ge­ous-Ale­xan­der. “Nothing more, nothing less than that. We were who we were all year.”

Sulod na sab sa pipila ka mga higayon nga nisulti si Gilgeous-Alexander nga buhaton niya ang tanan aron maandam ang iyang mga kauban sa playoffs ug nakita kini ning sangkaa.

“I have a great group of guys around me, and I know that,” dugang ni Gilgeous-Ale­xander.

“And I’ve known that for a long time. ... They obviously played amazing.”

Ang nagkagidlay nga Grizzlies gipangulohan nila ni Ja Morant ug Marvin Bagley III pinaagi sa ilang 17 puntos matag usa.

Gawas nila ni Morant ug Bagley III, wala na’y sakop sa Grizzlies ang nakamugna og dobleng numero nga puntos. / AP