Ningsikit na sa ganghaan sa seguradong luna sa playoffs ang Los Angeles Lakers human nila gipakaging ug gipanglampornas ang overall leader Oklahoma City Thunder, 126-99, sulod mismo sa balwarte niini ning Lunes, Abril 7, 2025 (PH time), sa National Basketball Association (NBA).
Ang Lakers ningsaka sa ikatulong puwesto sa Western Conference dala ang 48-30 nga rekord.
Ning puntoha, posible pa nga mosaka sa ikaduha ang Lakers kon maharos nila pagdaog ang katapusan nilang upat ka mga tahas sa regular season.
Dako na gyud og purohan ang Lakers nga makaderetso pagsulod sa playoffs apan dili sila angayang molugak gumikan kay tungod sa kasikit sa Western Conference standings, puwede pa sila mahagba og kalit sa Play-in tournament.
Inig human sa regular season, ang mopatigbabaw nga unom sa Eastern Conference ug Western Conference mao ang makaderetso pagsulod sa playoffs, ang No. 7 hangtod No. 10 teams moagi sa Play-in tournament samtang ang mahabilin mao ang manamilit og sayo.
Sa East, kompleto na ang unom nga nakaderetso sa playoffs samtang sa West, ang Thunder ug Houston Rockets pa lang ang nakaabante.
“We know it’s the final stretch into the full season, so we’re just trying to rack up great habits,” matod sa usa sa mga lider sa Lakers nga si LeBron James.
Nanginit og sayo si Luka Doncic aron dugkatan ang dominasyon sa Lakers.
Gipangulohan ni Doncic ang Lakers pinaagi sa iyang 30 puntos, nidugang og 20 puntos si Austin Reaves samtang niamot og 19 puntos si James.
Taliwala sa ilang pagkapilde, wala ra natay-og ang Thunder ug nagpabilin kining nag-una sa West ug overall dala ang 64-14 nga rekord.
Ang Thunder gipangulohan ni Gilgeous-Alexander pinaagi sa iyang 26 puntos samtang nihatag og 16 puntos si Jalen Williams. / AP