Thunder mipatong sa No. 1

Naangkon sa host Oklahoma City Thunder ang kasamtangang No. 1 overall spot ug division title human nila gipanglampornas ang Philadelphia 76ers, 133-100, ning Huwebes, Marso 20, 2025 (PH time), sa National Basketball Association (NBA).

Ang Thunder, nga ningsaka sa 57-12 nga rekord, nisikit na sab sa ganghaan aron maselyo nila ang Western Conference No. 1 spot niini pa lang puntoha sa 2024-25 season.

Nahimo kini sa Thunder bisan wala ang ilang upat ka starters nga naglakip sa leading MVP candidate ug season top scorer nga si Shai Gilgeous-Alexander, kinsa gihatagan og dayoff aron makapahuway.

Gawas ni Gilgeous-Alexander, kinsa nag-average og 33 puntos, ang Thunder ningkombati sab nga wala sila si Lu Dort, Isaiah Hartenstein ug Jalen Williams , kinsa pulos adunay angol.

Sa pagpadaplin sa ilang mga lider, ang Thunder nimugna og balanseng ataki aron dominahon ang 76ers, nga ningkombati sab nga kuwangan og mga haligi.

Pito ka mga magduduwa sa Thunder ang nakarehistro og dobleng numero nga puntos apan ang labing nikawat og dakong atensyon mao si Jaylin Williams, kinsa nitali og career-high 19 puntos, 17 rebounds, ug 11 assists alang sa iyang ikaduha pa lang nga career triple-double.

Si Aaron Wiggins maoy nangulo sa opensa sa Thunder pinaagi sa iyang 26 puntos, nidugang og 21 puntos si Isaiah Joe, niamot og 19 puntos si Chet Holmgren, nidugang og 16 puntos si Branden Carlsen, nihatag og 13 puntos si Kenrich Williams samtang nitunol og 11 puntos si Dillon Jones.

Ang 76ers gipangulohan ni Quentin Grimes pinaagi sa iyang 28 puntos, nitampo og 19 puntos si Justin Edwards, nihatag og 14 puntos si Chuma Okeke samtang ningtunol og 11 puntos matag usa sila si Alex Reese ug Guerschon Yabusele.

Ningkombati ang 76ers nga wala ang ilang starters nga sila si Tyrese Maxey, Kelly Oubre Jr., Joel Embiid ug Paul George, kinsa pulos adunay angol.

Sila si Embiid ug George pulos na dili makabalik pagduwa hangtod mahuman ang season. / AP