Nirehistro og career playoff-high nga 40 puntos si Jalen Williams aron agakon ang host Oklahoma City Thunder sa kadaugan batok sa Indiana Pacers, 120-109, sa Game 5 sa National Basketball Association (NBA) Finals sa Martes, Hunyo 17, 2025 (PH time), sa Paycom Center.
Sa kadaugan, ningsikit na sa ganghaan sa labing una nilang kampyunato ang Thunder bibit ang 3-2 nga bintaha sa best-of-seven series.
Ang prangkisa sa Thunder nakaangkon na og kampyunato sa tuig 1979 apan niadtong higayuna, nagbase pa ang ilang puwersa sa Seatlle ug gitawag og Supersonics.
Ang katambayayong ni Williams isip mga lider sa Thunder nga si MVP Shai Gilgeous-Alexander nidugang og 31 puntos ug 10 assists alang sa kadaugan.
Pagkahuman sa duwa, adunay mensahe si Williams nga angayang pangandaman sa Pacers ug sa tanang teams kabahin sa umaabot.
“We’re learning,” matod pa ni Williams nga napatik sa AP News.
Kini maoy ika-10 nga higayon nga nagkumboya sila si Williams ug Gilgeous-Alexander og 70 puntos ug labaw pa.
Ang mensahe ni Williams gisuportahan ni Thunder coach Mark Daigneault.
“It wasn’t a perfect game at all and there’s a lot of room for growth,” pasbaot ni Daigneault.
“But our improvement from Game 4 to Game 5 was critical.”
Sa sayong bahin sa 2nd quarter, ang Thunder nakaposte og 18 puntos nga labaw apan hinayhinay kining gikitkit sa Pacers.
Sa pagpangulo ni TJ McConnell, nakamaneho ang Pacers pagpahak sa labaw sa Thunder ngadto sa duha na lang ka puntos, 95-93, sa sayong bahin sa 4th quarter.
Apan human niini, nakontrolar pagbalik sa Thunder ang duwa ug ningderetso na sila paingon sa kadaugan.
Ang Game 6 motapon sa balwarte sa Pacers karong Biyernes, Hunyo 20.
Puntos matag usa:
Oklahoma (120)- Williams 40, Gilegous-Alexander 31, Wiggins 14, Wallance 11, Dort 9, Holmgren 9, Hartenstein 4, Caruso 2.
Indiana (109)- Siakam 28, McConnell 18, Nesmith 14, Turner 13, Toppin12, Nembhard 7, Mathurin 7, Bradley 4, Haliburton 4, Furphy 2. /Gikan sa wires