Gipangmakmak sa Oklahoma City Thunder ang hosts Portland Trail Blazers, 118-108, sa bugtong duwa sa National Basketball Association (NBA) ning Lunes, Enero 27, 2025 (PH time).
Niini, napahugtan og gamay sa Thunder ang ilang paggunit sa overall leadership bitbit ang 37-8 nga rekord.
Sama sa naandan, ang Thunder gipangulohan ni Shai Gilgeous-Alexander pinaagi sa iyang 33 puntos, nidugang og 24 puntos si Jalen Williams, niamot og 16 puntos si Isaiah Joe samtang nihatag og 14 puntos si Isaiah Hartenstein.
Ang Trail Blazers, nga nahagsa sa 17-29 nga rekord, gipangulohan ni Deni Avdija pinaagi sa iyang 28 puntos, nitunol og 25 puntos si Scott Henderson samtang niamot og 24 puntos si Toumani Camara.
Ning sangkaa, ningdominar ang Thunder sa ilawom nga bahin diin ilang gibiyaan og dako ang Thunder sa hinakutay og puntos, 52-22, ning dapita.
Gikan sa 27-27 nga panagtabla human sa 1st quarter, ang Thunder nagpauwan og sunodsunod nga three-pointers aron dugkatan ang pagbulhot sa ilang opensa hangtod nga nakaposte sila og 57-38 nga labaw sa nahabiling 4:28 minutos sa 2nd quarter.
Inanay nga ninggukod ang Trail Blazers hangtod nga napahak nila sa 93-88 ang labaw sa Thunder sa sayong bahin sa 4th quarter.
Human niini, nagpaulbo og three-point bomb si Williams aron dugkatan ang laing pagsutoy sa opensa sa Thunder.
Sa tungatungang bahin sa katapusang quarter, nainat pagbalik sa Thunder ang ilang labaw ngadto sa 105-90 ug ning higayuna, wala na sila ninglingi pagbalik. / AP