Labnihon na og suway sa Oklahoma City Thunder ang labing una nilang kampyunato sa ilang pag-asdang sa balwarte sa Indiana Pacers nga mao ang Grainbridge Fieldhouse alang sa Game 6 sa National Basketball Association (NBA) Finals karong Biyernes, Hunyo 20, 2025, sa las 8:30 sa buntag (PH time).
Ang prangkisa sa Thunder nakabaton na og usa ka titulo sa tuig 1979 apan niadtong higayuna, nagbase pa ang team sa Seattle ug gitawag kini nga Supersonics.
Labing seguro, naghinamhinam na og maayo ang Thunder nga humanon ang best-of-seven series ning kombatiha.
Apan nasayod ang Thunder nga kinahanglang dili sila magpadala sa ilang grabeng kahinam ug kinahanglang magtutok sila’g maayo tungod kay seguradong dili bastabasta moisa sa ilang puti nga bandera ang Pacers, nga usa sa teams nga wala pa nakatilaw og kampyunato.
Naglabaw ang Thunder sa series, 3-2.
“The way I see it, winning is all that matters. It hasn’t been fulfilled. We haven’t done anything,” matod sa lider sa Thunder nga si Shai Gilgeous-Alexander nga napatik sa AP News.
Gawas sa ilang labaw sa series, dili ikalimod nga puwerte na ka dako sa bintaha sa Thunder ning maong series human nila nadaog ang Game 5, 120-109.
Ning maong duwa, tataw nga gihasol ang lider sa Pacers nga si Tyrese Haliburton sa nasinati niyang angol (strained right calf) ug igo lang kini nakamugna og upat ka mga puntos.
Ning pagsuwat, dako pa nga pangutana kon makaduwa ba o dili si Haliburton ning kombatiha.
Kon regular season pa lang ning duwaa, labing seguro dili moduwa si Haliburton ug magpaalim kini og labing minos, usa ka semana. Apan NBA Finals kini unya nag-ung-ong pa gyud ang Pacers sa pultahan sa kapakyasan.
Niini, adunay purohan nga moduwa si Haliburton.
Naa o wala si Haliburton, ang Pacers andam mopagawas sa tanan nilang makaya ug gilaumang dako og matabang kanila ang seguradong maglanoglanog nga abiba sa ilang mga sumosunod.
“It’s a great opportunity in front of our fans. I’m sure it’s going to be a huge moment for our fans. They’re going to be super excited,” matod ni Pacers forward Pascal Siakam. / Gikan sa wires