Thunder sulod sa NBA finals
Nakataak pagbalik sa National Basketball Association (NBA) Finals ang Oklahoma City Thunder sa labing unang higayon gikan niadtong 2012.
Kini human gipangkusokuso sa Thunder ang Minnesota Timberwolves, 124-94, ning Huwebes, Mayo 29, 2025 (PH time), sa Game 5 nga maoy nakahuman og sayo sa Western Conference finals series, 4-1.
Sama sa naandan, ang Thunder gipangulohan sa kasamtangang MVP nga si Shai Gilgeous-Alexander pinaagi sa iyang 34 puntos, walo ka assists ug pito ka rebounds.
Alang ni Gilgeous-Alexander, wala pa sila’y angayang isaulog ug dili angayang mokampante gumikan kay wala pa nila natuman ang ilang misyon – kampyunato.
Daw naglagunog nga dugdog ang gipagawas nga opensiba sa Thunder aron kontrolahon ang Timberwolves gikan sa sinugdanan hangtod sa katapusan.
Sa NBA Finals, kontrahon sa Thunder ang modaog sa Eastern Conference Finals series diin kasamtangang naglabaw ang Indiana Pacers batok sa New York Knicks, 3-1.
Niadtong 2012 NBA Finals series, ang Thunder, nga gipangulohan pa nila ni James Harden, Kevin Garnett, ug Russell Westbrook niadtong higayuna, nasugamak sa 1-4 nga kapakyasan batok sa mas inilog nga Miami Heat, nga gipangulohan nila ni LeBron James, Dywane Wade, ug Chris Bosh.
Ning higayuna, ang Thunder, nga maoy No.1 overall human sa regular season, grabe ka inilog nga makaangkon sa ikaduha nilang kampyunato sa pagpangulo nila ni Gilgeous-Alexander, Jalen Williams, ug Chet Holmgren.
Ang Thunder, nga kalima nakasulod sa NBA Finals, nakabaton sa labing una ug bugtong pa lang nilang kampyunato niadtong 1979 dihang naa pa sa Seattle Supersonics ang ilang prangkisa.
Puntos matag usa:
Oklahoma (124)- Gilgeous- Alexander 34, Holmgren 22, Williams 19, Dort 12, Joe 11, Caruso 8, Hartenstein 8, Wallace 5, Dieng 3, Mitchell 2.
Minnesota (94)- Randle 24, Edwards 19, Shannon 11, Reid 11, Dillingham 7, Divincenzo 6, McDaniels 5, Garza 4, Minott 3, Gobert 2. / Gikan sa wires