Nahilakip si kanhi unified world champion Keith Thurman sa posibleng pipila lang nga nagtuong moresulta sa panagtabla ang away nila ni Filipino boxing icon Manny Pacquiao ug World Boxing Council (WBC) welterweight champion Mario Barrios niadtong Dominggo, Hulyo 20, 2025 (PH time), sa Las Vegas, USA.
Ning maong pagtuo, usa si Thurman sa mga dako kaayo og tingsi gumikan kay nidaog siya sa casino online betting.
Gibutyag ni Thurman sa interbyu sa www.fighthype.com nga nipusta siya sa MGM Grand og $500 sa Pacquiao-Barrios draw ug agi’g ginansya sa iyang nadaog, nakakolekta siya og $8,000.
“I got paid and I was happy with the draw,” matod ni Thurman, kinsa nagpakita sa social media sa betting ticket isip kamatuoran.
Gipadayag ni Thurman nga malipayon siya kay wala siya’y singot nga giusik sa pagpupo og $8,000.
Matod niya nga nasakto ang iyang prediksyon kay tingali, nasuweto siya sa boksing.
“Easy work. I don’t know. Maybe I know boxing. Maybe I don’t,” matod ni Thurman.
“The casino doesn’t want to let Manny lose. And I knew it was rare right, because Mario Barrios just came off a draw. And man I don’t know why.”
Ang pusta nga magtabla ang away aduna ra’y gamay nga purohan ug napatik kini sa casino nga 16/1, nagpasabot nga ang pusta nga $1 makadaog og $16.
Kon buot hunahunaon, mas nakasuwesto gyud hinuon si Thurman kabahin sa away kay pareho niyang nakontra sila si Pacquiao ug Barrios kaniadto.
Nailog ni Pacquiao ang World Boxing Association (WBA) welterweight crown ni Thurman niadtong 2019 diin dako og natampo sa split decision nga resulta ang 1st round knockdown nga narehistro sa Pambansang Kamao ng Pilipinas.
Paglabay sa kapin sa duha ka mga tuig, nibalik og away si Thurman ug iyang gidominar si Barrios pinaagi sa unanimous decision sa usa ka non-title bout. / ESL