Armado sa Barangay Malubog sa Dakbayan sa Sugbo ang gironda sa mga sakop sa City Mobile Force Company sa Cebu City Police Office (CCPO) sa iyang panimalay alas 12:14 sa kaadlawon, Sabado, Hunyo 7, 2025 pinasikad sa search warrant nga giluwatan sa korte, armas ug drugas ang nasakmit sa kapulisan.
Ang suspek gitago sa pangala’ng Ferdie, 52, taga Sityo Catilong, Barangay Malubog, bukiran nga barangay.
Si Executive Judge Anacleto Debalucos ang Presiding Judge sa RTC Branch 17 sa Dakbayan sa Sugbo niluwat og search warrant sa kalapasan sa Republic Act 10591 o Comprehensive Law on Firearms and ammunitions.
Atol sa gihimong pagsiksik sa balay sa suspek nakuha sa mga polis ang usa ka kalibre .38 nga pistola nga dunay duha ka mga bala sa iyang barrel.
Lakip sa nakuha sa mga personnel sa CMFC ang pinakete sa gituohang shabu sa iyang bulsa.
Nakadawat og impormasyon ang kapulisan nga mag daladala og armas ang suspek ilabi na panahon nga mahubog.
Tungod niini gipaubos sa monitoring ang suspek ug sa dihang nakompirmar ang kasayuran ila kining giaplayan sa korte og search warrant nga giaprobahan usab dayon.
Duha ka kaso ang atubangon ni Ferdie kini mao ang kalapasan sa RA 10591 ug ang Section 11, Article II, Republic Act 9165 o pagmintiner og illegal nga drugas. / AYB