NAPOSASAN ang usa ka 23 anyos nga lalaki sa gilusad nga buy-bust operation sa Mabolo Police Station alas 10:51 sa gabii, Sabado, Hunyo 21, 2025 sa Sitio Mabuhay, Barangay Luz sa siyudad sa Sugbo.
Ang suspek giila nga si Jefferson Caliao Vargas alyas Jepoy, 23, residente sa Sitio Silangan, Barangay Tejero sa dakbayan sa Sugbo.
Nakuha gikan kaniya ang mga pinakete sa gituohang shabu nga motimbang sa 4.74 gramos nga dunay balor nga P32,300, nga gi-turnover na sa Cebu City Forensic Unit alang sa himuon nga chemical analysis.
Sa imbestigasyon sa Mabolo Police Station, nasayran nga nakadawat sila og report nga ang suspek maoy tighagbong og supply sa ilegal nga drogas sa Barangay Luz.
Tungod niini ila ning gipaubos sa imbestigasyon ug sa dihang nasuta nga tinuod ang nakuha nga kasayuran mipahigayon dayon sila og anti-illegal drug operation sa pagpangulo sa Mabolo Drug Enforcement Unit sa pakig-alayon sa Philippine Drug Enforcement Agency.
Kasong kalapasan sa Section 5 ug 11, Article II, Republic Act 9165 ang ipasaka sa Mabolo Police Station batok sa suspek. / AYB